? RUN OF KILLERS ?
ජාවාරම ?️
දොළොස්වන කොටස

දින කිහිපයකට පසු :

එක් දිනක් උදෑසන තේ කඩයේ හිමිකරු ගොවිපලට පැමිණියේය. ඔහුට කැමති ඕනෑම වේලාවක එහි යාමට අවසර තිබුනි.
” මුදලාලි මොකද මේ පැත්තෙ ”
චන්ද්‍රෂේකර් හාන්සි වී සිටි ඇඳෙන් නැගිටිමින් ඇසුවේය .
” ඇයි දැන් ෂේකර් අපි එනවට කැමති නැත්ද?”
මුදලාලි සිනාසී ඇසුවේය .
” මුදලාලි දන්නවනෙ මුදලාලිට ඕන වෙලාවක මෙහේ එන්න පුළුවන්. මම එවපු රුපියල් පනස්දාහ හම්බුනාද?”
” ඔව් ඔව්, ඒක නෙවෙයි අර මනුස්සයා කොහොමද ? වැඩටික හොඳට කරගෙන යනවද? ”
” ආ කියන්න තරම් වරදක් නෑ , මිනිහා කම්මැලි නෑ ඕන වැඩකට රෙඩි , වෙන එවුන් වගේ නෙවෙයි මට මිනිහව හිත⁣ට අල්ලලා ගියා. මේ ළඟදි ෆම් එකේ රුපියල් පන්දාහක් වැටිලා තියලා මිනිහා මගෙ අතටම ගෙනත් දුන්නා ”
චන්ද්‍රෂේකර් රත්නපාලව වර්ණනා කලේය.
” මං මේ ආවේ බොහොම වැදගත් පණිවිඩයක් අරගෙන”
” මොකක්ද මුදලාලි ”
⁣” මේ ළඟදි කෝවිල පාරේ ⁣විකුණන්න දාලා තිබුන ගෙදරකට අලුතෙන් පවුලක් ආවා,අම්මයි දුවයි විතරයි මිනිහා මැරිලා , ලස්සන කෙල්ල , අම්මත් නියමෙට ඉන්නවා ”
” මුදලාලි කොහොමද විස්තර දන්නෙ?”
” ඊයේ ගෑනි කඩේට ආවා , මම කතාවට හෙමීට අල්ලගත්තා ”
” අදහස නම් හොඳයි , අපිට තව කෙල්ලො තුන් දෙනයි ඉන්නෙ , බලනවකො මුදලාලි මේ සල්ලි තියෙන බිස්නස්කාරයෝ ගෙදර ගෑනිව පැත්තක තියලා එන්නෙ පොඩි කෙල්ලොන්ව හොයාගෙන , ගිය මාසෙට විතරක් තුන් දෙනෙක් ගියා , ෆේස්බුක් එකට මැසේජ් එක යවනවා විතරයි ”
” සල්ලි තමයි චන්ද්‍රෂේකර් , මොකද කියන්නෙ මේ දෙන්නටත් වැඩක් දෙමුද?”
” මම රවියට කියන්නම් ”
……………………………………………………….?

? දින තුනකට පසු:

මේ අතර B10 පොලිස් මූලස්ථානයේ ස්ථානාධිපතිවරයා , පොලිස් පරීක්ෂකවරයා සහ උප පොලිස් පරීක්ෂකවරයා ඇතුලු නිළධාරීන් දස දෙනෙකු විශේෂ සාකච්ඡාවක නිරත වී සිටියේය.
ඒ අතර පොලිස් කොස්තාපල්වරයෙකු පැමිණ ස්ථානාධිපතිවරයාට යමක් පැවසූ අතර ස්ථානාධිපතිවරයා පො.පරීක්ෂකවරයාට ඉඟියක් දුන්නේය. ඔහු මූලස්ථානයෙන් පිටත වූ කුඩා ක්‍රීඩා පිටියට පැමිණි අතර එහි පොලිස් විශේෂ කාර්ය බලකායට අනුයුක්ත තරුණ නිළධාරීන් පස් දෙනෙකු සිටියේය.

” සර් ”
නිළධාරීන් පොලිස් පරීක්ෂකවරයාට අචාර කලේය.
” බොහොම ස්තූතිය අපේ ඉල්ලීම පිළි අරගෙන ආවට, ඇත්තම කිව්වොත් මේක ටිකක් අමාරු මිෂන් එකක්. පොඩ්ඩක් හරි වැඩේ ගැසුසුනොත් ජීවිත හතර පහරක් අනතුරේ, ඒ නිසා හොඳ කල්පනාවෙන් මේ වැඩේ කරන්න ඕන.”

” ඕ.කේ සර්”
” හරි ඔය පස් දෙනාට කරන්න තියෙන්නෙ……………………………………………”
පො.පරීක්ෂක කෝසල එදින රාත්‍රීයේ ඔවුනට සිදු කිරීමට නියමිත මෙහෙයුම පිළිබඳව ඔවුනට පැහැදිලි කල අතර රාත්‍රී හතට ආසන්නව තිබියදී MP5 අවි සන්නද්ධ විශේෂ කාර්ය බලකායේ නිළධාරීන් පිරිස පො.පරීක්ෂක කෝසල යටතේ සූදානම්ව සිටියේය.

“හොඳට මතකයිනෙ ධනංජය , එකෙක්ටවත් පැනලා යන්න දෙන්න එපා, අනිත් එක උන් අපිට ඇටෑක් කරන්න ඉඩ තියෙනවා ⁣, අපි රෙඩි වෙලා ඉන්න ඕන”
” ඕ.කේ සර් ”
…………………………………………….?

ඒ B15 නඟරයේ මුඩුක්කු නිවාස අතර වූ එක් නිවසකි වේලාව රාත්‍රී අට පසු වී ඇත. එහි එක් නිවසක් තුල තරුණයන් පස් දෙනෙකු මත්පැන් පානය කරමින් සිටියේය.
” මචං මම නම් කියන්නෙ අපිට මේ හම්බවෙන ගාන මදි, උන් කරන්නෙ ගෑනු ටික පරිස්සම් කරන එක විතරනෙ , අපි එහෙමද පොලිසියට වැලි ගහලා ලොකු ගේමක් දීලා කෙල්ලෙක්ව උස්සන්න ඕන. අහු වුනොත් අපිට ජීවත කාලෙටම කල්දේරම් බත් කන්න තමයි වෙන්නෙ”
” නොදකින් උඹේ කට, හිටපන් හැමදේම කරන්න වෙලාවක් එනවා, ⁣ඊට පස්සෙ පුළුවන් ඌරගෙ මාළු ඌරගෙ ඇඟේ තියලම කපන්න”

” ඩක්, ඩක්, ඩක්”
තරුණයන්ගේ කතාව අතරතුර නිවසේ දොරට යමෙකු තට්ටු කරන හඬක් ඇසුනි.
” බලපන් කවුද කියලා, අර විමලයද දන්නෙ නෑ”
එක් තරුණයෙකු නැගිට ගොස් දොර විවර කලේය.
…………………………………….?

එදින රාත්‍රීයේ කඩයට මිනිසුන් නොපැමිණි නිසා මුදලාලි එය වසා දැමීමට තීරණය කලේය.නමුත් ඒ අවස්ථාවේම තරුණයන් තිදෙනෙක් පැමිණ එහි තිබූ පුටු මත අසුන් ගත්තේය.
” මහත්තයලට ⁣තේද , කෝෆිද?”
එහි සිටි එකම සේවකයා පැමිණ ඇසුවේය.
” නෙස්කැෆේ නැත්ද?”
” ඒව මෙහේ නෑ මහත්තයා ”
” නැත්ද , එහෙනම් අපි නෙස්කැෆේ හදමු ”
පැමිණි එක් තරුණයෙකු ඉන තිබූ පිස්තෝලයක් ගත් අතර මුදලාලි කලබලයට පත්ව ජංගම දුරකථනය අතට ගත්තේය .
” ෂේකර්ටද කතා කරන්න හැදුවෙ?”
එක තරුණයෙකු මුදලාලි සමීපයට ගොස් ඇසුවේය
” උඹලා කවුද මම පොලීසියට කතා කරන්න කලින් මෙතනින් පලයන් ”
මුදලාලි පැවසූ දෙයට තරුණයා සිනාසී සාක්කුවේ තිබූ යමක් ගෙන ඔහු ඉදිරියේ තැබුවේය.
” පොලීසියටද කතා කරන්න ඕන , කතා කරපන් … බොරුවට රඟපාන්නෙ නැතුව අපිට ෂේකර්ගෙ ෆාම් එක තියෙන තැන පෙන්නපන් , නැත්නම් තව විනාඩි පහක් යන්න කලින් මේ මුළු කඩේම අළු කරලා දානවා උඹවත් එක්කම”
” හ ..හ හරි සර් මං පෙන්නනම් , මං පෙන්නන්නම් යමු සර්”
මුදලාලි ගොඩ දැමූ මාළුවෙකුට සමාන විය .
මුදලාලිගේ මගපෙන්වීමට අනුව ක්‍රියා කල පො.⁣පරීක්ෂක කෝසල ඇතුලු නිළධාරීන් චන්ද්‍රෂේකර්ට අයත් ගොවිපල කරා පැමිණි අතර ගොවිපලට හැතැප්ම දෙකක් පමණ තිබියදී ඔවුන් ජීප් රථය නවතා දැමීය.
” එක්කෙනෙක් මෙතන ඉන්න , අනිත් කට්ටිය යමු මාත් එක්ක”
ජීප් රථය අසල එක් නිළධාරියෙකු තබා අනෙක් සියල්ල ගොවිපල තෙක් ආරක්ෂිතව ගමන් කලේය.

……………………………………..?……………………………………….

? චන්ද්‍රෂේකර්ගෙ අවසානයද?