? RUN OF KILLERS ?
ජාවාරම ?️
පස්වන කොටස

තම දෛනික පුරුද්දක් වශයෙන් කෝසල දිනපතා පාන්දර අවදි වී ව්‍යායාම වල නිරත වෙයි . එදින අවදි වී ශාරීරික අභ්‍යාස අවසන් කල කෝසල නානකාමරයට ගොස් පිරිසිදු වී පැමිණෙන අතරතුර කිසිදා නොවූ වෙනස් අත්දැකීමක් දැකගන්නට හැකි විය. මින් පෙර තමාම උදෑසන තේ කෝප්පය සාදා ගන්නා අතර ඇතැම් දිනයන් වලට එය මගහැරී යයි. නමුත් එදින ටීෂා විසින්
එය සාදාගෙන පැමිණියේය.
” වෙනදට නම් ඕක මම තනියම හදාගන්නෙ , ඒත් සමහර දවස්වලට ඒකත් අමතක වෙනවා”
කෝසල ඇය විසින් පිළිගැන්වූ තේ කෝප්පය අතට ගෙන පැවසුවේය.
” මට මේ වැඩ හොඳට පුරුදුයි ”
” ටී එක නම් මරු ”
ඇය කෝසලට ⁣නොදැනෙන සේ ඔහු තේ කෝප්පය පානය කරන අයුරු බලා සිටියේය.නිවසින් පිටත්ව යාමට පෙර කෝසල තම මුදල් පසුම්බිය අතට ගෙන රුපියල් දෙදාහක් ටීෂා අතට දුන්නේය.
” ඇයි සර් මේ”
” ගෙදර ඕන කරන දේවල් තියෙනවා , බය වෙන්න එපා තමන්ගෙ තැනක් කියලා හිතාගෙන ඉන්න. මේ ළඟ හෝටලයක් නෑ . ඒ හින්දා මොනවා හරි හදාගන්න , අඩුපාඩුවක් තියෙනවනම් ඉස්සරහ පොඩි කඩයක් තියෙනවා ඒකෙන් ගන්න ”
” හරි සර් ”
” මේ ඕක දැන්වත් නවත්තනවකො හලෝ .කවුරුත් ඉන්න තැන මට සර් කිව්වොත් විනාසයි. ”
කෝසල තම මෝටර් රථයේ දොර විවර කරමින් පැවසූ දෙයට ටීෂාගේ මුහුණට සිනාවක් ගෙනාවේය.
” හ්ම්… අයියා ලන්ච් එකට ගෙදර එනවද?”
” අද නම් බැරි වෙයි , කොහොමත් මම එනකොට රෑ අට විතර වෙනවා , උදේම ගන්න තියෙන දෙයක් අර කඩෙන් අරන් දරුවත් එක්ක ගෙදරට වෙලා පරිස්සමෙන් ඉන්න. තව දෙයක් ඔයාව නුහුරු නිසා ඔය කඩේ මනුස්සයා අහයි කවුද කියලා , කවුරු ඇහුවත් ඔයාට වෙච්ච කිසි දෙයක් කියන්න එපා . වෙලාවෙ හැටියට කියන්න තියෙන්නෙ එකම දෙයයි . තේරුනාද?”
කෝසල තවත් වැදගත් යමක් ඇයට වටහා දී නිවසින් පිටත් විය.
………………………………..?

තම බිරිඳ හා දරුවා නිවසින් පලවා දැමූ රෝයි. චන්ද්‍රෂේකර් නැමති පුද්ගලයාගේ ජාවාරම් නිවසින් රැගෙන ආ සුරංගි නැමති කාන්තාව සිය නිවසට රැගෙන ආවේය.
” අද ඉදලා මේ තියෙන්නෙ ඔයාගෙ ගේ , ඔයයි මමයි විතරයි. ” රෝයි ඇයව යහන මතට ගනිමින් පැවසුවේය .
” කෝ ඔයාගේ වයිෆ් , දරුවා ”
” සුරංගි මන් කිව්වනෙ , ඒ දෙන්නා ආයෙත් එන්නෙ නෑ”

රෝයි ඇය වටා එතී කම්සැප විඳින අතරතුර ටීෂා තම දියණිය සමඟ කෝසලගේ නිවසේ තනිවිය.
………………………………………….?

B10 පොලිස් මූලස්ථානයේ පොලිස් පරීක්ෂක අංශයේ වැඩ බාරගත් කෝසලට ලැබුනේ වික්‍රමගේ අතුරුදහන් වීම සහ ඔහුගේ බිරිඳ ගයනිගේ සිය දිවි හානි කර ගැනීම අතර සම්බන්ධය සෙවීමයි. උදෑසන සේවයට වාර්තා කල ⁣පො.පරීක්ෂක කෝසලට නැවුම් බවක් දැනුනේ පෙර දින රාත්‍රියේ තමාට හමු වූ තරුණියත් කුඩා දියණියත් නිසා බව කෝසලට මනාව වැටහී තිබුනි. ඒත් සමඟම උදෑසන සුභ ප්‍රවෘත්තියක් ඔවුනට ලැබී තිබුනි. ඒ B13 ප්‍රදේශයේ කැළැවක් තුල අයිතිකරුවෙකු නොමැති ත්‍රී රෝද රථයක් තිබෙන බවයි. ඒ අනුව පො.පරීක්ෂක කෝසල සහ සැරයන් කපිල ඇතුලු තවත් නිළධාරීන් දෙදෙනෙක් එම ස්ථානයට පිටත් විය. එහිදී ඔවුනට දැකගන්නට ලැබුනේ කැළෑව තුල සඟවා තිබූ ත්‍රී රෝද රථයයි.

” කපිල, දැන්ම කෝල් එකක් ගන්න වික්‍රම වැඩ කරපු ටැක්සි කම්පනි එකට , අහන්න මේ ත්‍රී වීල් නම්බර් එක රෙජිස්ටර් කරලා තියෙන්නෙ ඒ කම්පනි එකටද කියලා”
” හරි සර්”
ඒ අනුව සැරයන්වරයා ෆයිසාඩ් කුලී රථ ප්‍රවාහන ආයතනයට දුරකථන ඇමතුමක් ලබා ගත් අතර ඔවුන්ගෙන් ගන්නා ලද තොරතුරු වලට අදාළව එය වික්‍රම නැමති පුද්ගලයා භාවිතා කල ත්‍රී රෝද රථය ලෙස තහවුරු විය.
ඔවුන් ත්‍රී රෝද රථය පොලිස් බාරයට ගෙන අවට පරීක්ෂා කොට පොලිස් මූලස්ථානයට පැමිණි අනතුරුව කෝසල තම පරීක්ෂණ කටයුතු ආරම්භ කලේය.
” සර් , අපිට මේ සිද්ධියට කෙලින්ම වික්‍රම වැරදිකාරයා කරන්න බෑ. මොකද සතියකට කලින් වික්‍රම අතුරුදහන් වෙනවා.හරියටම ඊට දවස් අටකට පස්සෙ
ගයනි සුයිසයිඩ් කර ගන්නවා. මේ සිද්ධි දෙක එක ළඟ වගේ වුනා නම් අපිට තිබුනා වික්‍රම සැක කාරයෙක් කියලා හිතන්න. ”
” ඒ වුනාට කෝසල එදා වික්‍රම සල්ලි ගන්න ආවේ වෙන කෙල්ලෙක් එක්ක , කෝසලට හිතෙන්නෙ නැත්ද වික්‍රමට ඔය CCTV වල හිටිය කෙල්ල එක්ක අනියම් සම්බන්ධයක් තිබුනා. ඒක ගයනි දැනගත්තා. සතියක් විතර එක දිගට වික්‍රම ගයනිව බලන්න ආපු නැති එකේ
⁣හිත් වේදනාවට ගයනි සුයිසයිඩ් කර ගත්තා කියලා”

ස්ථානාධිපතිවරයා ඔහුගේ මතය ඉදිරිපත් කලේය.

” වෙන්න පුළුවන් සර්, ඒත් ඇයි වික්‍රම අර විදිහට ත්‍රී වීල් එක කැලේක දාලා ගියේ, වැදගත්ම දේ තමයි එදා ගයනි මාකට් ගිහින් අරන් ආපු එළවළු මල්ල ඇනෙක්ස් එක ළඟ වැටිලා තිබුනා කියන එක , මොකද වොචමන් කියන විදිහට ඒ වෙලාවෙ කවුරුත් ගයනිගෙ පස්සෙන් ඇවිල්ලත් නෑ ”

” ඔව් සර් , කෝසල සර් කියන කතාවත් අපිට අහක දාන්න බෑ , ෂික් කොහෙද මේ අපාර්ට්මන්ට් එකේ CCTV ත් වැඩ නෑනේ”
………………………………………….?

සියලු රාජකාරී වැඩ අවසන් කල පො.පරීක්ෂක කෝසල තම නවාතැනට යන විට රාත්‍රී නවය ආසන්නව තිබුනි. වෙනදා පුරුද්දට දොර අගුල හැරීමට සැරසුනි ඔහු තම හිසටම තට්ටුවක් දමමින් දොරට තට්ටු කලේය.
” කවුද ?”
” ටීෂා , මම කෝසල ”
ඇය දොර විවර කල අතර සාලයට පිවිසි කෝසලට දැක ගත හැකි වූයේ සියල්ල පිළිවෙලකට සකස් කර තිබූ නිවසකි.
” වෙනදට ඉතින් මේව කෙරෙන්නෙ නිවාඩු දවසක් ආවොත් තමයි, බබා කෝ?”
” එයා නිදි, සර් වොෂ් එකක් දාගෙන එන්න මම කෑම ලෑස්ති කරලා තියෙන්නෙ ”
” ඔයා කෑවද? ”
” නෑ, මම ඔයා ….. නෑ සර්”
කෝසල ඇය පැවසීමට ගිය දේ වැළැක්වූයේ ඔහුගේ අත ඇගේ මුව මත තබාය.
” හැමදාම ඔහොම මගෙ ළඟින් ඉන්න පුළුවන්ද?”
” සර් , සර් මොනවද මේ කියවන්නෙ , මම කසාඳ බැදලා ළමයෙක් ඉන්න ගෑනියෙක් . මගෙ මිනිහා මාවයි දරුවවයි එළියට දැම්ම එක ඇත්ත.ඒත්, යන එනමක් නැතුව අනාථ වෙලා පාරේ හිටිය මට සර් දවසක් හරි කන්න ⁣බොන්න දීලා මෙහෙම ඉන්න දුන්න එකටත් මම සර්ට ණයයි. සර් වැදගත් රස්සාවක් කරන මනුස්සයෙක් සර්ගෙ අම්මලා තාත්තලා සර්ට කවදා හරි හොඳ වැදගත් පවුලක කෙනෙක් හොයලා දෙයි. තවදුරටත් මම මෙහේ ඉන්න එක සර්ට හරි නෑ ඒ හින්දා මම හෙටම දරුවත් එක්ක ගමට යනවා”

” ඔයාගෙ කතාව ඉවරද ටීෂා , එහෙනම් මෙතනින් චුට්⁣ටක් වාඩිවෙන්න ”
කෝසල ඇයට එසේ පවසා තම කාමරයේ වූ ලාච්චුවෙන් යමක් ගෙන විත් ඇය අසලින් වාඩි විය.
ඉන් පසු ඔහු ඡායාරූප කිහිපයක් ඇය ඉදිරියේ තැබුවේය.
” ටීෂා , ඔයාට අදටත් අම්මා තාත්තා කියලා දෙන්නෙක් මේ ලෝකේ ඉන්නවා, ඔයා අකමැති වුනාට දැන් වුනත් ඒ මිනිස්සු ඔයාව බාර ගන්නවා. අම්මා , තාත්තා මේ ලෝකේ ජීවත් වෙලා ඉන්නකන් තමන්ගෙ දරුවන්ට ආදරෙයි. මම ඉපදෙනකොට මගේ අම්මා මාව දාලා ගියා. ෆොටෝ එකකින් ඇර මම කවදාවත් මගෙ අම්මව දැක්කෙ නෑ . ඊට අවුද්දකට පස්සෙ මගෙ තාත්තා වෙන කෙනෙක්ව කසාඳ බැන්දා , ඒත් ඒ මනුස්සයා මම ගෙදර ඉන්නවට කැමති වුනේ නෑ , හැබැයි අම්මා මාව දාලා ගියාට එයා මාව තනි කරේ නෑ , ඊට පස්සෙ මගෙ ආච්චියි සීයයි මාව අවුරුදු විස්සක් වෙනකන් බලාගත්තේ එයාලගෙම දරුවෙක් වගේ . මට අවුරුදු පහලවේදී සීයා නැතිවුනා. ඒත් ආච්චි කොහොම හරි දුක්විඳලා මට ඉගැන්වුවා. සීයා නැතිවෙන්න කලින් කියපු දෙයක් තමයි, ‘ පුතේ කවදා හරි රස්සාවක් කරපන් අහස් මාළිඟා හදලා සුර සැප විඳින්න නෙවෙයි, උඹ පය ගහලා ඉන්න මේ රටට සේවයක් කරන්න පුළුවන් ‘ ඒ වචනෙ අදටත් මට මතකයි , මට අවුරුදු විසි පහේදී මේ ලෝකේ මට හිටපු එකම කෙනා ආච්චිත් මාව දාලා ගියා, හැබැයි මම අද සතුටු වෙනවා මම එයාලගෙ හීනෙ ඉෂ්ට කරා, එස්.අයි බැජ් පළන්දන දවසෙ මගෙ ආච්චිගෙ ඇස් වල තිබුන කදුළු මට මැවිලා පේනවා. එයා නැති වුන දවසෙ ඉදලා අවුරුදු දෙකක් තනියම මම මේ ගෙදර හිටියා. මොකද අම්මා තාත්තා නැති මට කවදාවත් ගෙදරකට ගිහින් කසාඳ ගැන කතා කරන්න බැරි නිසා. ඔයාට දැනුනේ නැති වුනාට ඊයෙ මන් සීතලේ සෝෆා එකට වෙලා ඉන්නකොට ඔයා ඇවිල්ලා මගෙ ඇඟට බෙට් ෂීට් එක දාලා ගිය වෙලාවෙ මම ඇහැරුනා. මට ඒ වෙලාවෙ මට හිතුනෙ මගෙ අම්මා මගේ තනියට කෙනෙක් එවලා කියලා. කමක් නෑ ටීෂා , මම තරහා නෑ , ඔයාට කැමති කාලයක් ඔයයි දරුවයි මෙහේ ඉන්න , මගෙන් කිසිම කරදරයක් ඔයාට වෙන්නෙ නෑ මොකද මගෙ අම්මට තියන ගෞරවය මම මේ ලෝකේ ඉන්න හැම ගෑනියෙක්ටම තියනවා”

කතාවේ අවසානයේ ටීෂාගේ මෙන්ම කෝසලගේ ඇස්ද කදුලින් තෙමී තිබුනි . කෝසල පුටුවෙන් නැඟිට යාමට සැරසුනත් ටීෂා ඔහුගේ අතින් අල්ලා ගත් අතර සිය දෑතින් කෝසලව බදාගත්තේ කදුළු සලන දෑස් වලිනි.

” නෑ , අයියේ මට සමාවෙන්න ඔයාගෙ හිත රිද්දුවා නම් , මම ඔයාව දාලා කොහෙවත් යන්නෙ නෑ . මම ඔයාගෙ අම්මා වගේ හැමදාම ඔයා ළඟින්ම ඉන්නවා . අනේ අයියෙ කවදාවත් මගෙ දරුවව නම් මගෙන් ඈත් කරන්න එපා. ”
” නෑ ටීෂා එයා දැන් ඔයාගෙ විතරක් නෙවෙයි මගෙත් දරුවා , අම්මා කෙනෙක්ට දරුවෙක්ගෙ තියෙන වටිනාකම මම ඉපදුන දවසෙ ඉදලම දන්නවා. අපි තුන් දෙනාම එකම පවුලක් කියලා හිතන්න.”

…………………………………………..?

? හිතපු නැති විදිහට ටීෂා මේ කතාවට ආවේ ඇයි?