? RUN OF KILLERS ?
ජාවාරම ?️
හයවන කොටස

සුපුරුදු පරිදි උදෑසන ශාරීරික අභ්‍යාස වල යෙදී නිවසට පැමිණි කෝසල දුටුවේ පාන්දර අවදි වී මුළුතැන්ගෙයි කෑම පිළියෙල කරමින් සිටි ටීෂවයි.
“ඇයි පාන්දරම උයන්නෙ? ”
කෝසල වතුර වීදුරුවක් පුරවාගන්නා අතරතුර ඇසුවේය.
” ෆිට්නස් ගැන හිතනවා වගේම කෑම ගැනත් හිතන්න ඕන නේද? . හැමදාම කඩෙන් කන්නත් හොඳ නෑනේ අයියෙ, උදේට කාලා , දවල් කෑම එක අරගෙන යන්න. ”

ටීෂා කඩිමුඩියේ කෑම පිළියෙල කරන අතරතුර පැවසුවේය.

” අනේ මන්දා, මම කවදාවත් හිතපු නැති දෙයක් තමයි කෙල්⁣ලෙක්ගෙ අතින් උයපු කෑම ටිකක් කන්න පුළුවන් වෙයි කියලා , මේ ඔයාගේ කෑමවල පුදුම රසක්නෙ තියෙන්නෙ. ඇත්තමයි ඊයේ රෑ මට ඔක්කොම කන්න හිතුනා ”

” අයියට කන්න කැමති මොනවද කියන්නකො, මම ඕන දෙයක් හදලා දෙන්නම් . ඒක නෙවෙයි අයියෙ මගෙ බෑන්ක් අකවුන්ට් එකෙත් සල්ලි ටිකක් තියෙනවා අපි මෙහේ ඉන්නෙ නැතුව ටිකක් ඈතින් ගෙයක් හොයාගමුද? එතකොට මට බය නැතුව මාකට් එකට වුනත් යන්න පුළුවන්”

” කොහොමත් මේ කේස් එක ඉවර වුන ගමන් මම හිතාගෙන ඉන්නෙ මෙහෙන් යන්න. ගෙදර වැඩත් ඔක්කොම වගේ ඉවරයි ⁣ බොරුවට තැන් තැන් වල ඉන්න ඕන නෑ . අපි ඉක්මනට රෝයිගෙන් ඩිවෝස් එක අරගෙන එන්ගේජ්මන්ට් එක ගමු. එතකන් ඔයා දරුවත් එක්ක ගෙදරට වෙලා ඉන්න ”

………………………………….?

දිනක් රෝයි වැඩ අවසන් වී නිවසට පැමිණියේ දහවල් ආහාරය ගැනීමේ බලාපොරොත්තුවෙනි. නමුත් රෝයිගේ ක්ෂණික කෝපය එදින ක්‍රියාත්මක විය. මන්ද සුරංගි විසින් දහවල් ආහාරය පිළියෙල නොකර තිබූ අතර ඇය රූපවාහිනි වැඩසටහනක් නරඹමින් සිටියේය.

” මේ තමුසෙට උයන්න බැරිද , එදත් දවල් මම ගෙදර ආපු වෙලාවෙ බඩගින්නෙ , අදත් එහෙමයි”
” මේ රෝයි , මම මේ ගෙදර වැඩකාරී නෙවෙයි හරිද?
ඔයාට ඕන නම් කඩෙන් කන්න , මාත් කඩෙන් කෑවෙ”
රෝයි කිසිසේත් බලාපොරොත්තු නොවූ පිළිතුරක් සුරංගිගේ මුවින් පිට වූ අතර රෝයි ඇයගේ දෙවුරෙන් අල්ලා කෙලින් කලේය.
” මොකක්ද ගෑනියේ උඹ ඒ කිව්වෙ? දැන් මමද මේ ගෙදර උයන්න ඕන”
” රෝයි මේ ටීෂා තමුසෙගෙ කටට බය වුනාට මම බය වෙන්නෙ නෑ හරිද? තමුසෙමනෙ ගිහින් මාව අරගෙන ආවේ”
කේන්තිය පාලනය කර ගත නොහැකි වූ රෝයි අසභ්‍ය වචනයෙන් බැන වදිමින් ඇයට පහර පිට පහර දුන් අතර ඇයද රෝයිට දෙස් තියමින් කෑ ගැසූ අතර අවට
නිවෙස් වැසියන්ට එය මහත් හිසරදයක් විය.
……………………………….?

පො.පරීක්ෂක කෝසල වික්‍රම නැමති පුද්ගලයාගේ අතරුදහන් වීම පිළිබඳ විමර්ශන කටයුතු වල යෙදෙමින් සිටි අතර උප පොලිස් පරීක්ෂක ධනංජය සහ ස්ථානාධිපතිවරයා පැරණි නඩුවක් පිළිබඳව සාකච්ඡා කරමින් සිටියේය. ඒ අතරම ස්ථානාධිපතිවරයාගේ දුරකථනය නාද වෙයි.

” හෙලෝ B10 පොලිස් ස්ටේෂන් හියර් ”
ස්ථානාධිපතිවරයා පිළිතුරු දුන්නේය.
අනෙක් කෙලවරින් එක දිගට යමක් ප්‍රකාශ කල අතර ස්ථානාධිපතිවරයා නිහඬව එය අසා සිටියේය.
” හොඳයි මට ඔය කියන ගෙදර එඩ්‍රස් එකයි. මිනිහගෙ නමයි කියන්න ”
ස්ථානාධිපතිවරයා අසල තිබූ පොතක් ගෙන එය සටහන් කර ගත්තේය.
” හොඳයි අපි මේ ගැන හොයලා බලන්නම්”
එසේ පවසමින් ස්ථානාධිපතිවරයා ඇමතුම විසන්ධි කලේය.
” බලනවකො ධනංජය , මේ තියෙන ප්‍රශ්න මදිවට අපිට දැන් පවුල් ප්‍රශ්නත් විසඳන්න වෙලා.”
” ඇයි සර් මොකද?”
” මේ ඇඩ්‍රස් එක අයිති ගෙදර ඉන්න මිනිහා හැමදාම ගෑනිත් එක්ක රණ්ඩුලු , අහල පහල මිනිස්සුන්ට ඉන්න විදිහක් නැහැලු , සාජන්ට් මද්දුමගේට කියනවා පී.සී කෙනෙක් එක්ක ගිහින් මේ මිනිහට ඇඩ්වයිස් එකක් දීලා එන්න කියලා”
” සර් , මට මේ වෙලාවෙ වැඩක් නෑනේ , මම යන්නම්, අනික සාජන්ට් මද්දුමගේ ගෙදරකට ගියොත් ඒ ගෙදරින් කාලා බීලා එන මිනිහා, සර් මට ඇඩ්‍රස් එක දෙන්න
” ඒකත් හොඳයි , එහෙනම් තමුසෙ ගිහින් පොඩ්ඩක් බලනවා”
………………………………?

දුරකථන ඇමතුමෙන් ලැබුණු ලිපිනයට අනුව උ.පො පරීක්ෂක ධනංජය ජීප් රථයේ රියදුරු කොස්තාපල්වරයා සමඟ එම නිවස පිහිටි ස්ථානයට ගමන් කලේය. අදාළ නිවසට ලං වත්ම එහි ගේට්ටුව ඉදිරිපිට වෑන් රථයක් නවතා තිබුනි. තෙමහල් නිවසක් වූ එය විශාල තාප්පයකින් වටව තිබුනි.

” පොඩ්ඩක් ඔහොම නතර කරන්න”
උප පොලිස් පරීක්ෂකවරයා රියදුරුට නියෝග කලේය.
වෑන් රථය අසල සිටි පුද්ගලයන් දෙදෙනෙකුගෙන් එක් අයෙකු රියදුරු අසුනට ගොඩවත්ම ගේට්ටුවෙන් පිටතට පුද්ගලයෙකු පැමිණියේ තරුණියක් සමඟයි.
ඒ දුටු උප පොලිස් පරීක්ෂකවරයාගේ මුහුණේ ඉරියව් වෙනස් වූ බව කොස්තාපල්වරයාට වැටහුණි. උ.පො පරීක්ෂකවරයා වහා තම ජංගම දුරකථන අතට ගෙන යමක් දෙස වුවමනාවෙන් බැලූ අතර පසුව වෑන් රථයට ගොඩවදින තරුණිය දෙස වුවමනාවෙන් බැලුවේය.

” පී.සී අපි ආපහු පොලිස් ස්ටේෂන් එකට යන්න ඕන,ඉක්මනට වාහනෙ ගන්නවා”
…………………………………….?…………………………………………………………

? S.I ධනංජය දැක්කෙ කාවද?