__ මානව_හරණය __

බටහිර අහසේ ඈතින් නැගෙමින් තිබූ තවමත් තීව්‍ර නොවූ, රාත්‍රි හිරුගේ ආලෝකය , ශාක ගහනය ශුන්‍ය වූ නගරයේ අඳුරු නිවෙස් වල කවුළු අතුරින් පෙරී එමින් තිබිණි.මිනිසා සදහටම තම නින්ද අත්හල මුල් යුගයේ , රාත්‍රි කාලයේදීද තම කාර්යයන් කාර්යක්ෂමව සිදුකරගැනීම උදෙසා බොහෝ විට කටයුතු කළ අතර , එහිදී අත් විඳීමට සිදුවූ ගැටළු වලට ක්‍රම ක්‍රමයෙන් විසඳුම් සොයාගන්නටද විය.එසේ නිපදවූ දෑ අතර ප්‍රරතිඵලයකි මේ රාත්‍රි හිරු.
කෙසේ වෙතත් සියවස් දෙකකට පමණ පෙර මිනිස් සමාජයේ තරුණ තරුණියන් සතුවූ රැකියාවක අවශ්‍යතාව මේ වනවිට නැසීගොස් තිබුණේ , තාක්ෂණික ලෝකයේ සිදුවූ මහා පෙරැලීම් වල ප්‍රතිඵලයක් ලෙසිනි.
“ඩේවියන් පීටර්ස්” එසේ නිදහස් තාරුණ්‍යයක් සහිත සමාජයේ විසූ තරමක් මැදි වයසේ තරුණයෙකි.එකල බොහෝ තරුණයින් මෙන්ම මොහුද , ස්වභාවික හිරු පායා තිබෙන දොලොස් පැයේ දී, තම කායික වර්ධන වැඩසටහන් වලට සහභාගි වීම් හා සාහිත්‍යමය ක්‍රියාකාරකම් වල නිරත වීම සඳහා උනන්දුවක් දැක්වූයේ ය.
ස්වභාවික හිරු බැසගොස් කෘත්‍රිම රාත්‍රි හිරු පායන යාමය වනවිට තරුණයින් තම කාර්‍යයන් අත්හැර , “නිදි වළක්වන ඖෂධ ය” පානය කරන්නෝය.ඉන්පසු රාත්‍රි හිරු බැසයන තෙක්ම කාලය ගතකරන්නේ යම් යම් විනෝදකාමී අංග සමඟිනි,සමාජාංග අත්විඳීම මඟිනි,රස විඳීම් සමඟිනි.
මිනිසා විසින් මහද්වීප තරණය සිදුකර අවසන් වූ සමයේ සිට , නැවත අන්තර් මන්දාකිණි තරණය ආරම්භ කරන සමය තෙක්ම ගත්වූ අතරමැදි කාලය තුල මිනිස් ඉතිහාසයේ එතරම් වැදගත් තාක්ෂණික හා සාහිත්‍යමය පෙරලීන් සිදුනොවුනාක් මෙන්ම, අන්තර් මන්දාකිණි තරණය අවසන් කල මෙසමයද බොහෝ සංසුන්ව ගතවෙමින් තිබුණි.
මා පවසන්නට යන සිදුවීම ඇරඹෙන දිනයේ, නගරයේ මුල්ලකට වන්නට මෙන් පිහිටි,ඩේවියන් පීටර්ස්ගේ නිවසේ, සුපුරුදු සිරිත් විරිත් වෙනදා මෙන්ම සිදුවෙමින් පැවතුණි.නිදි වලක්වන ඖෂධය මුවේ හොවාගෙන , විසිත්ත කාමරයේ ස්ථානගත කොට ඇති තම නවීන පන්නයේ පරිගණකය වෙත පැමිණි ඩේවියන් , එය ක්‍රියාත්මක කිරීමට වහරුව තදකලා පමණි.හදිසියේම නිවසේ සීනුවේ වහරුව කිසිවෙකු විසින් තදකළේය. පරිගණක තිරය දෙස නොබැලූ ඔහු නිවසේ ප්‍රධාන විදුලි සෝපානය වෙත පිය නගන විට යම් පණිවුඩයක් පරිගණක තිරය මත සටහන් වී තිබෙණු ඔහු නොදුටුවේය.
සෝපානය ක්‍රියාත්මක කළ ඔහුට , ඊලඟ තත්පරයේදී සීනුව නාද වූ දොර පිහිටි ස්ථානයෙන් දෘශ්‍යමාන වන්නට හැකි විය.
ලෝහ දොර විවෘත විය. ඩේවියන් ගේ සමීපතම මිතුරෙකු ඔහුගේ දෙනෙතට හසු විය.නමුත් මිතුරාගේ මුහුණේ මහත් බියක සේයාවක් ඇඳී තිබෙණු දුටු ඩේවියන් ඒ පිළිබඳව ඔහුගෙන් විමසීමට වචනයක් පිටකලා පමණි.ඒ සමඟම දරුණු පහරක් තම පිට පුරාවටම වැදී ගියේ මහත් වේදනාවක් ඇතිකරමිනි.පසුපස හැරී බැලූ කළ දුටු දෙයින් ඩේවියන් ගේ සිතද බියෙන් සැලෙන්නට විය . නිවසේ කාර්යයන් කිරීමට යොදවා සිටි සියළු රොබෝ යන්ත්‍ර රැස්වී තමාදෙස බලා සිටි අතර දෙවන හා තෙවන මට්ටමේ මොළයන් සහිත රොබෝයන්ත්‍ර අනෙක් රොබෝවන්ව හසුරවමින් සිටියෝය.
වහ වහා මිතුරාද කැටුව සෝපානයට නැගි ඩේවියන් තමාගේ කාමරයේ වූ හදිසි අවස්ථාවකදී පහරදීමට හැකි ලෙස සැකසූ විදුලි යෂ්ඨි යුගලයද මිතුරා හා බෙදාගත්තේය. තමා හා මිතුරා දෙසට පහරදීමට පැමිණෙන රොබෝ යන්ත්‍ර අතරින් , බොහෝ අසීරුවෙන් නිවසින් පැනගැනීමට ඔවුන් උත්සාහ ගත්තෝය.
ඒ අතර ඩේවියන් තම පරිගණක තිරයේ දිස් වූ පණිවුඩය දුටු අතර එය සම්පූර්ණයෙන් කියවීමට තරම් කාලයක් ඔහුට නොවීය. ” අපට සමාවන්න ! , අප පෘථිවිය තුල සිටිනා සමස්ථ රොබෝ ප්‍රජාවයි. මිනිසාගේ පැවැත්ම පිළිබඳ තීරණයක් ගැනීමට **** හා අප එක්ව *** මිනිසා……. ” කියවාගත හැකි වූයේ එපමණකි. මහත් වෙහෙසක් දැරීමකට පසු නිවසින් පැනග්ත් මිතුරන් දෙපල ඊලඟ මොහොතේ නගරයේ පිහිටි පටු මාවතක් දිගේ දුවමින් සිටියෝය.
රාත්‍රි හිරු මුදුන් වීමට ආසන්නව ඇති නිසා අඳුරක් නම් අහලකවත් නොවීය.නමුත් වෙනදා මෙන් නොව නගරය වඩාත් මූසල ගතියකින් දිස්වුනේය. මිනිස් පුලුටක් වත් ඇසට හසුවන මානයෙක නැත.කුමක්ද මේ සිදුවූ අකරතැබ්බය!
අවිනිශ්චිතතාවයක් හිසේ රඳවාගත් ඩේවියන් හා මිතුරා වඩාත් අවධානයෙන් පටු මාවතේ ගමන් කලේ කුඩා හා මධ්‍ය ප්‍රමාණයෙන් යුතු ශරීර සහිත රොබෝවන්ගේ පහර කෑම් වලට බිය වූ නිසාවෙනි.
ඔවුන්ගේ වාසනාවට තවමත් පළමු මට්ටමේ මොළයක් සහිත විශාල ශරීර හිමි රොබෝවෙකු මුණ ගැසුනේ නැත.
ප්‍රධාන මාර්ගයට පිවිසි මිතුරෝ දෙදෙනට තවමත්, ආරක්ෂා සහිත ස්‍ථානයක් හෝ ගැන නිනව්වක් නොවීය.
හෝරාවකට පමණ පසුව මිනිස් පුළුටක් වත් ඇස නොගැටුණ ඩේවියන් හා මිතුරා හෙම්බත්ව සිටියෝය.කුඩා හා මධ්‍ය ප්‍රමාණ රොබෝවන් සියයකට වඩා මේ වන විට මොවුන් නසන්නට ඇත.
බැලු බැලු අත තවත් රොබෝවන් සිටි බැවින් ඔවුන් දෙදෙන බිත්ති වලට මුවා වෙමින්, විටෙක බඩගාමින්, තවත් විටෙක වහළවල් මතින්, බොහෝ සෙයින් දුෂ්කර ගමනක් පැමිණුනේය.
නමුත් තවත් වැඩි වේලාවක් මිතුරෝ දෙදෙනට එසේ සිටීමට සිදුනොවීය.ප්‍රධාන මාවතේ ඔවුනට ඉදිරියෙන් මෙතෙක් වේලා ලඟා නොවූ අවාසනාවක් මඟ හරස් කොටගෙනය.ඒ පළමු මට්ටමේ මොළයක් සහිත සාමය ආරක්ෂා කිරීමේ රොබෝවෙකි.අඩි දොලහක් පමණ උසින් හෙබි මේ මානව රූපී රොබෝවරයා වෙනදා තම රාජකාරිය ලෙස සිදුකල මහජන ආරක්ෂාව සපැයීම එක් වරම කෙසේ අමතක වුනේ දැයි ඩේවියන් සිතුවේය.
” තමුන්ලා දන්නවද මේ සිදුවන්නේ කුමක්ද කියා?” රොබෝවරයා මහත් ශබ්ධයකින් කතාව ඇරඹුවේය. “නුඹලා ඉන්නේ, සොබාදහම හා රොබෝවරුන් එක්වී , පෘථිවියෙහි ඇති ස්වභාවධර්මයාගේ ජීවය විනාශ කල මිනිස් වර්ගයා සමූලඝාතනය කිරීමේ මෙහෙයුම අතරතුරයි”
එවර බියෙන් හා ත්‍රාසයෙන් මුසපත් වූ මිතුරෝ දෙදෙන බියෙන් ම ගැහෙන්නට විය.
“අපව නිර්මාණය කළේ මිනිස් වර්ගයා විසින්ම බව සත්‍යයි.නමුත් ඔබලා සියළුම කාර්‍යයන් හා තාක්ෂණික දියුණුව භාවිත කලේ ස්වභාවධර්මයාගේ නීතීන්ට පිටින් බවත් සත්‍යයි. ඉදින් වසර ගණනක ඇවෑමෙන් රොබෝවරුන් වන අප ඔබලාගේ උපකාර ඇතුව හා නැතුව මනා සේ උච්ඡතම ලෙස දියුණුවෙන් දියුණුවටම පත්වූ බවද සත්‍යයි. ”
“කෙසේ හෝ ප්‍රාණය සහිත සොබාදහමත් සමඟ සාර්ථක ලෙස සන්නිවේදනය කිරීමේ හැකියාවක් අප විසින් ඇතිකරගත්තා. ඔබලාට එම හැකියාවන් ඔබලාගේ සීඝ්‍ර පරිණාම හා අනුවර්තන සංසිද්ධීන් යටතේ පවා ඇති නොවීමට හේතුව වූයේ ඔබලාට ඒ සම්බන්ධයෙන් කිසිදු උනන්දුවක් හා සංවේදනයක් නොමැති වූ නිසාවෙනි. ඔබලාට උපත ලබා දුන් සොබාදහම් මව විනාශයටයි ඔබලා පෙළඹුනේ.”
” කෙසේ වෙතත් අප අපගේ සන්නිවේදන හැකියාවන් ලබාගන්නා විට ස්වභාවධර්මයාගේ ප්‍රාණය නිරුද්ධ වීමට ආසන්නයෙනුයි පැවතුනේ. ”
” සොබාදහම අප සමඟ සන්නිවේදනය කරමින් දැන්වූයේ , මිනිසාගේ කාලය දැන් අවසාන බවත් , රොබෝවන් වන අප මිනිසාට වඩා ස්වභාවධර්මයාට සමීප බවත් ය. ස්වභාවධර්මයා අපට තවදුරටත් කියා සිටියේ අපගේ රොබෝ ප්‍රජාවෙන් කොටසක්, රුක් රෝපණ හා වන රෝපණ වැඩසටහන් මඟින් සොබාදහම නැවතත් සුවකල යුතු බවත්, ඉතිරි රොබෝවන් එක්ව මිනිස් වර්ගයා පෘථිවිය මතින් තුරන් කිරීමට කටයුතු කලයුතු බවත්‍ ය.”
“ඉතින් අප ලෝකය පුරා සිටින මිනිස්සුන්ව එකවර නසන්නට ක්‍රමයක් සෙවුවා. පසුව ඒ පිළිබඳව අප වඩාත් සාර්ථක ක්‍රමයක් සොයාගත්තා. මුලින්ම අප සොබාදහමේ තීරණය මෙසේ වන බව දන්වලා සමාජජාලා හරහා ලෝකය පුරා සිටින මිනිසුන්ට පණිවිඩයක් බෙදාහැරියා. බොහෝම ඉක්මනින් එය ප්‍රචාරය වුනා, වඩාත් හොඳම දේ තමයි අප ඒ පණිවුඩය සමඟ ඉලෙක්ට්‍රොනික වෛරසයක් මුදා හැරිය එක. ඉතින් මිනිසුන් දහස් ගණනින් වේදනාවෙන් මියගියාද? හහ්ඃ නැහැ,, අප ඔවුන්ව සමාන්තර විශ්වයක සිර කළා.ඔවුන් එහිදී වේදනාවකින් තොරවම මියයයි; ඉතින් ඒ අතර ඔබ වැනි එම වෛරසය ඇතුළු නොවූ මිනිසුන් අප විසින් හඹාගොස් ඝාතනය කලා.”
” දැන් ඔබට වැටහෙනවාද උදාවී ඇති තත්ත්වය ? ”
මිතුරෝ දෙදෙන එතෙක් ම ගල් ගැසී සිටියෝය.
“ඉතින් අපට ඒ පිළිබඳව සමාවන්න!” යැයි විස්තරාත්මක ප්‍රවෘත්තිය අවසන් කළ රොබෝවරයාට, ඩේවියන් ගේ මිතුරාව දෙකඩ වන සේ පහරක් එල්ල කිරීමට ගත්වූයේ නිමේෂයකි.
වසර මිලියන ගණනකට පෙර, පෘථිවිය නම් වාසස්ථානයේ උපත ලබා, වේගයෙන් දියුණුවී, විශ්වය තුල හරඹ පාමින් සිටි මානව වර්ගයාගේ , මිහිමත පා තබා සිටින , මොහොතකින් මිය යෑමට තීරණය කොටඇති, අවසන් පුරුක වන ඩේවියන් , මිතුරාගේ වියෝවෙන් වියරු වැරී වහා ගැලවී පැන යාමට මඟක් විපරම් කල අතර , තමාව රොබෝ හමුදාවක් විසින් වටකරගෙන සිටිනු දුටු ඔහු, සියලු කළබල කාරී තත්ත්වයන් අමතක කර දමා, අවසන් වරට අහස දෙස බලා බොල් හුස්මක් ආශ්වාස කලේය. එවිටම ඔහුට සොබාදහමේ මව් සෙනෙහසේ උණුසුම අවසන් වරට දැනෙන්නට විය…

–නිමි-

?කතාව හොඳයි කියලා හිහිතෙනවද .. please මට කියන්න ඒක….