•කාල සංචාරය-තුන්වෙනි සංචාරය

“අයියා ඇයි කලබලෙන්? ” කවිනි මෙතෙක් වෙලා තම හිතේ තිබූ ප්‍රශ්නය ඇසුවාය

“Time Ghost ටීම් එක මේ කාලයට ඇවිල්ලලු.”

“මොක්කු?”

“TT ආයතනයට විරුද්ධ අය.”

“ඉතින් අපි පැනලා යනවද?”

“ඔව්….. මේ වගේ වෙලාවක ආධුනික නිලධාරීන්ව තියාගන්න බෑ. ඔයා….”

“ඒගොල්ලො පහර දුන්නොත් මෙතන ඉන්න අයට මොකද වෙන්නෙ?”

“අපිත් පහර දෙනවා…..”

“TTලා පැරදුණොත්? ”

“විකාර කතා කියවන්නෙ නැතුව මෙන්න මෙහෙ එන්න.” කේන්තියෙන් කියූ බවක් පෙන්නුවත් හෙෂාන් බියට පත් වුණු බව කවිනි තේරුම් ගත්තාය.

හෙෂාන් කලබලයෙන් කාල සංචරකයේ බොත්තම් තද කළේ කවිනිගේ අත තරයේ අල්ලා ගනිමින්ය. මඳ වේලාවකින් ඔවුන් සිටියේ හවස කවිනි යාමට සිටි කඩය අසලය. කඩය වසා දමා තිබුණු අතර පරිසරය අඳුරුය.

“වෙලාව පාන්දර 3යි.” කවිනිගේ හිතේ තිබූ ප්‍රශ්නය අඳුනා ගත් ලෙසින් හෙෂාන් කීවේය.

“ඔයා ප්‍රධාන මධ්‍යස්ථානයට එන්න කලින් ඉදලා තියෙන්නෙ මෙතන. ඒත් වෙලාව ටිකක් වෙනස්. ඔයා ප්‍රධාන මධ්‍යස්ථානයට ආපු දවසෙ උදේ…… ම්….. දැන් ඔයා ඉන්න ඕනා ගෙදර.” ඔහු නැවත කීවේය.

“දැන් අපි කොහෙද යන්නෙ?” කවිනි ඇසුවාය.

“නංගිගෙ ගෙදර. මට පාර පෙන්නන්නකෝ.”

“ඊට පස්සෙ?”

“ඊට පස්සෙ නංගිව ගෙදර නවත්තලා, මම යනවා ප්‍රධාන මධ්‍යස්ථානයට. ”

“මම උදව් කරන්නම්….. අනේ….. මට ආසයි…… මට පුළුවන් උදව් කරන්න….”

“ඔයා එකපාරටම අතුරුදහන් වුණොත් ගෙදර කට්ටිය බය වේවි.”

“ඉතින්, අයියගෙ පවුලෙ අයත් බය වෙලා ඇත්තෙ. ඒත්, එහෙම වුණා කියලා අයියා මේ මෙහෙයුම නවත්වන්නෙ නෑනෙ.”

“ඔයත් හරියට අපෙ නංගි වගේ….. පුදුම කරදරයක් තියෙන්නෙ.”

“මම එහෙම තමයි…… දේකට ආස වුණොත් ඒක කොහොම හරි කරනවා.”

“ඔව් ඉතින්,  එක වගේ කුරුල්ලො එක අත්තෙනෙ වහන්නෙ. ඔයා මගෙ නංගිගෙ යාලුවා වුණු එකට නම් මං පුදුම වෙන්නෙ නෑ.”

“පුදුම වෙන්නත් එපා. දැන් අපි යමු ප්‍රධාන මධ්‍යස්ථානයට. ”

ඔවුහු ප්‍රධාන මධ්‍යස්ථානය වෙත පැමිණ ප්‍රධානීන්ට ප්‍රහාරය පිළිබඳ පැවසුවෝය. වැඩිහිටියන් ඒ පිළිබඳ වැඩිදුර තොරතුරු සොයා බලන අතර හෙෂාන් කවිනිට TT ආයතනය ගැන වගේම කාල සංචාරය ගැනත් කියා දුන්නේය. ඇය ඉක්මනින්ම ආධුනික පුහුණුව හමාර කොට ස්ථිර TT නිලධාරිනියක් බවට පත් වූවාය. ඉන්පසු හෙෂාන් ඇයට Time Ghost Team එක ගැන සියලු විස්තර කියා දී ඔවුන්ට විරුද්ධව ගෙන ඇති ක්‍රියාමාර්ග ගැන පැහැදිලි කළේය.

කුමන ආකාරයක සැලසුම් තිබුණත් කවිනිගේ අවධානය යොමු වූයේ කාල සංචරකය අක්‍රිය කිරීම වෙතය. පාසලේදී ඇගේ වයසෙහි සිසුවියන් අතරෙදි IT විෂයට දක්ෂතම සිසුවියක් වූවත් TT ආයතනයේ සිටි පරිගණක විශේෂඥයින් සමඟ සැසඳීමේදී කවිනිට ඇති පරිගණක දැනුම ඉතා අඩුය. ඒ කෙසේද යත්, එම පරිගණක විශේෂඥයෙකුගේ පරිගණක දැනුම ඩයිනෝසරයෙකුට උපමා කළහොත් කවිනිගේ දැනුම උපමා කිරීමට සිදු වන්නේ මැස්සෙකුටය.

TT ආයතනයේ පරිගණක විශේෂඥයින්ව ඇසුරු කරමින් තම දැනුම වර්ධනය කර ගත් කවිනි සෑම දෙයක්ම ඉක්මනින්, උනන්දුවෙන් ඉගෙන ගත්තාය. හෙෂාන් ඇයට හැකි සෑම විටම උපකාර කළ අතර ඔහු බොහෝ විට යන්ත්‍ර සමඟ ක්‍රියා නොකර සතුරන් සමඟ මුහුණට මුහුණ සටන් කළේය.

TT ආයතනය හා Time Ghost Team එක අතර යුද්ධයේ ගිනි දැල් තදින් ඇවිලී යද්දී මේ කණ්ඩායම්වලට අයත් නොවූ පිටස්තර ලෝකය මේ මහා යුද්ධය ගැන කිසිවක් නොදැන සතුටින් හා සාමයෙන් කල් ගෙවූහ. බොහෝ කාල සංචාරකයින් මේ යුද්ධයෙන් මිය ගියත් කාලය හරහා ගමන් කොට අතීතයට ගොස් නැවත නැවතත් ඔවුහු සටන් කළෝය. සාමාන්‍ය පුද්ගලයින් අතර සිදුවන යුද්ධවලට වඩා කාල සංචාරකයින් අතර වූ මෙම යුද්ධය ඉතාමත් දරුණු විය.

පරිගණක වෛරස මගින් තම විරුද්ධකරුවන්ගේ ආරක්ෂක පද්ධති අඩාල කිරීමට උත්සහ දැරීම මෙම යුද්ධ සමයේදී වැඩියෙන්ම කැපී පෙනුණි. බුද්ධිමතුන් වූ මොවුන් දෙගොල්ලෝම අතින් පයින් සටන් කරනවාටත් වඩා සිය බුද්ධිය මෙහෙයවා මොළයෙන් කරන සටන්වලට වැඩි තැනක් ලබා දුන්නෝය. ඇත්තෙන්ම කාල සංචාරකයින් යනු සටන්කරුවන් නොව විද්‍යාඥයින්ය; පර්යේෂකයින්ය. මෙම යුද්ධය වඩ වඩාත් දරුණු වීමට එය එක් හේතුවක් විය.

යුද්ධයේ දරුණු බව එන්න එන්නම වැඩි වර්ධනය වෙද්දී කවිනි අන් අයගෙන් දුරස්ව යුරේකා සමඟම කාලය ගත කළාය. Time Ghostලාගේ කාල සංචරකය අක්‍රිය කිරීමට නොහැකි බවට සෑම පරිගණක විශේෂඥයෙකුම පැවසුවත් කවිනි ඒ පිළිබඳවම පර්යේෂණ කළාය. යන්ත්‍රයක් වූ යුරේකාගෙන් ඇයට අවශ්‍ය සෑම උපකාරයක්ම ලැබෙද්දී TT පරිගණක විශේෂඥයින් ඇයට සිනාසුණෝය. TT ආයතනයේ ප්‍රධානීන් පවා ඇයගේ ක්‍රියාවන් නිශ්ඵල යැයි පවසද්දී කවිනි පසුබට නොවී තම අරමුණ ඔස්සේ ඉදිරියට ගියාය.

තත්පර, විනාඩි, පැය, දවස්, සති, මාස වේගයෙන් ගෙවී ගියේය. කවිනි යුරේකාත් සමඟ ක්‍රියා කිරීමට පටන් ගෙන මාස හයක් ගෙවී ගොස් ඇත. ඇය පරිගණක සමඟ හැරෙන්නට සබඳතා පැවැත්වූයේ හෙෂාන් සමඟ පමණයි. ඒ මාස හය පුරාවටම ඇය යුරේකාව තබා ඇති කුටියෙන් පිටතට ගියේ නැත. සියල්ලන්ටම ඇයව විහිළුවක් වෙද්දී ප්‍රධානීන් තීරණය කළේ ඇය TT ආයතනයේ ප්‍රධාන පරිගණකය හෙවත් යුරේකා සමඟ කරන කටයුතු නැවැත්විය යුතු බවයි. මන්ද යත්, කවිනි කුඩා දැරියක වූ නිසා ඇයගේ අතින් පරිගණකයට හානියක් වේදැයි ඔවුහු බිය වූහ. නමුත් ඇයගේ පර්යේෂණ සාර්ථක වුවහොත් ලැබෙන ප්‍රතිලාභ ගැන පැහැදිලි කෙරූ හෙෂාන් ඇයට දිගටම පර්යේෂණ කටයුතු කර ගෙන යාමට ඉඩ සලසා දුන්නේය.

කවිනිගේ දීර්ඝ කාලීන පර්යේෂණය සාර්ථක විය. TT ආයතනයේ කොපමණ පරිගණක විශේෂඥයින් සිටියත් ඇයට සහය වූයේ යුරේකා ඇතුළු පරිගණක කිහිපයක් සහ හෙෂාන් පමණයි. විශාල පරිගණක දැනුමක් හිමි පරිගණක විශේෂඥයින්ට අක්‍රිය කිරීමට නොහැකි වූ කාල සංචරක සියල්ලම තම සුළු පරිගණක දැනුම භාවිතයෙන් කවිනි අක්‍රිය කළාය. එතනින් නොනැවතී Time Ghost Team එකේ පරිගණක ජාලය අඩාල කිරීමට ද ඇය සමත් වූවාය.

Time Ghost Team එක සම්පූර්ණයෙන්ම දුර්වල වූයේ ඔවුන්ගේ පරිගණක ජාලය බිඳ වැටීමත් සමඟයි. නැවතත් ඔවුන් නැඟී සිටීමට පෙර ඔවුන්ට සිතා ගැනීමටවත් කාලයක් නොතබා TT ආයතනයේ සෑම අංශයක්ම එකතු කර ගත් කවිනි Time Ghost Team එකට සිතා ගත නොහැකි තරම් විශාල ප්‍රහාරයක් එල්ල කළාය. වැඩිහිටියන්ටත් වඩා ඇයට උපකාර කළේ ළමුන්ය. නමුත් අවසාන මොහොතේ ඇයව විශ්වාස කෙරූ සෑම TT නිලධාරියෙකුම ඇයගේ නායකත්වය යටතේ සටන් කළහ.

කවිනිගේ ප්‍රහාරය සාර්ථක විය. Time Ghost සාමාජිකයින් සියලු දෙනාවම අත්අඩංගුවට ගන්නා ලදී. කවිනිගේ උත්සහය, ධෛර්යය, කැපවීම හැම කෙනෙකුගේම ප්‍රශංසාවට ලක් විය.

TT ආයතනය ලෝකය පුරා පැතිරී ඇති රහස්‍ය සංවිධානයක් වූ නිසා කවිනි ගැන එතරම් ප්‍රසිද්ධ නොවූවත් TT ආයතනයට සම්බන්ධ සෑම රටකම රාජ්‍ය නායකයින් ඇයව පැසසුවෝය. TT නිලධාරින්ගේ වීරවරිය වූයේ ඇයයි.

TT ආයතනය උත්සවයක් සංවිධානය කෙරූ අතර එහිදී කවිනිට ත්‍යාග ලබා දීමට ද කටයුතු සූදානම් කර තිබුණි. උත්සවයේදී ද සියල්ලන්ගේම ප්‍රශංසාවට ලක් වූ ඇය ප්‍රසිද්ධ චරිතයක් වීම නිසාම අපහසුතාවයකින් පෙලුණාය. ඇයට උත්සවයේදී කතාවක් කිරීමට ඇරයුම් ලැබුණු හෙයින් ඇය සියල්ලන්ව ඇමතුවාය.

“මෙම උත්සවයට පැමිණි සියලු දෙනාගෙන් අවසරයි. ඇත්තෙන්ම අද අපි ලොකු යුද්ධයක් දිනලා තියෙනවා. ඒ ගැන මම ගොඩක් සතුටු වෙනවා. ඒ වගේම ඔබ සියලු දෙනාම පවසනවා මම නිසා තමයි මේ යුද්ධය ජය ගත්තෙ කියලා. මමත් මේ ජයග්‍රහණයට දායක වුණා. ඒත් ඇත්තටම මේක මම තනියම කරපු වැඩක් නෙමේ. මම TT සාමාජිකාවක් වෙන්නටත් කලින් බොහෝ දෙනෙක් මේ ජයග්‍රහණය වෙනුවෙන් කැපවුණා.

කාල සංචරකය අක්‍රිය කිරීම ගැන කියනවා නම් මම ඒක කළේ තනියම නෙමේ. TT පරිගණක විශේෂඥයින් ඔවුන්ගෙ දැනුම මාත් එක්ක බෙදා ගත්තා. TT ප්‍රධාන පරිගණකය, යුරේකා මට ගොඩක් උදව් වුණා. හෙෂාන් අයියා ගැන විශේෂයෙන්ම සඳහන් කරන්න ඕනා. හැමෝම මට මේක කරන්න බෑ කියලා මාව අවිශ්වාස කරද්දි මාව විශ්වාස කෙරුවෙ එයා විතරයි. ඒ හැමෝටම ගොඩක් ස්තුතියි. ඔබ මට ප්‍රශංසා කරනවා නම් ඒගොල්ලොන්ටත් ප්‍රශංසා කරන්න. මොකද, ඒගොල්ලො නැති වුණා නම් මට කාල සංචරක අක්‍රිය කරන්න වෙන්නෙ නෑ.

Time Ghost Team එකට එල්ල කරපු අන්තීම ප්‍රහාරයේදී වුණත් මගේ සැලැස්මට අනුව වැඩ කරපු TT නිලධාරින්ට ගොඩක් ස්තුතියි. ඒ ප්‍රහාරය සාර්ථක වුණේ මගේ සැලැස්ම නිසා නෙමේ. අපි සාර්ථක වුණේ අපේ එකමුතුකම නිසායි. අන්තිම මොහොතෙදි Time Ghost Team එකට නොතිබුණු TT ආයතනයට තිබුණු ප්‍රධානම ශක්තිය වුණේ TT නිලධාරින්ගෙ එකමුතුවයි. මම කෙරුවෙ ඒ එකමුතුකම ඇති කරපු එක විතරයි.

ඉතින්, මේ ජයග්‍රහණය තුළ හැම TT නිලධාරියෙක්ම වීරයෙක්. මොකද, එක්කෙනෙක් හරි පැත්තකට වෙලා හිටියා නම් අපිට මේ ජයග්‍රහණය ලැබෙන්නෙ නෑ.  ඔබ සියලු දෙනා මෙතෙක් වෙලා මට කරපු හැම ප්‍රශංසාවක්ම හැම TT නිලධාරියෙකුටම ලැබෙන්න ඕනා. මොකද, මගේ තනි සටනක් නිසා මේ ජයග්‍රහණය ලැබුණෙ නෑ. අපි හැමෝම එකමුතු වෙලා කරපු සටනක් නිසයි අපිට මේ ජයග්‍රහණය ලැබුණෙ.

සෑම TT නිලධාරියෙක්ටම හුඟක් ස්තූතියි අපිට මේ ජයග්‍රහණය අරන් දුන්නට. අපි එකමුතුව වැඩ කෙරුවොත් අපිට කරන්න බැරි දෙයක් නෑ. අසා සිටි ඔබ සැමට ස්තූතියි.”
_______________________________________
ඔයාලට කතාව ගැන හිතෙන දේවල් කියන්න යාලුවනේ. විශේෂයෙන්ම මගෙ අඩුපාඩු කියාගෙන යන්න. හතරවෙනි කොටසින් හමුවෙමු.