02 කොටස

හිතුවේ බීපු මිනිහෙක් කෑ ගහනවා කියලා .නිකමට හඬ ආපු පැත්තට හැරිලා බැලුවේ .

වයස අවුරුදු විසි එකක විසි දෙකක තරුණියක් පස්සේ එළවන අවුරුදු පනහක වගේ මිනිහෙක් මම දැක්කේ .

කකුල් දෙක වැහෙන්නම දිගම දිග සායක් ඇඳලා හිටපු ඒ කෙල්ල වෙරළ දිගේ දුවගෙන ආවේ අඬ අඬම.

” කිව්වම අහලා නැවතියන් ….උඹට අද මගෙන් බේරෙන්න බෑ ….

පැනලා යන්නද හැදුවේ උඹ ….”

එහෙම කිය කිය කෑ ගසමින්ම ඒ මිනිහා අර කෙල්ල පස්සේ එළවන් ආවේ .

පැනලා යන කතාවක් ඇහුණු නිසාම මම හිතුවේ ඒකි කොල්ලෙක් එක්ක පැනලා යද්දී අහු වෙලා කියලා .

හැම කෙල්ලෙක් ගැනම මගේ හිතේ මේ වෙනකොට තිබුණේ තරහක්.ඒ නිසාම මම ඒකි දුවගෙන එන ඉස්සරහට ගිහින් ඒකිගේ අතකින් අල්ලගෙන දුවන්න බැරි වෙන්න නතර කර ගත්තා .

” අත ඇරපන් …අත ඇරපන් මාව….

යන්න දීපන් මට මේ නරුමයගෙන් බේරිලා ….”

ඒ කෙල්ල එහෙම කිය කියම මගෙන් අත මුදව ගන්න පොර බැදුවත් මම ග්‍රහණය පොඩ්ඩක් වත් ලිහිල් කරේ නෑ .වයසක මිනිහත් හති දම දම ඇවිත් මගේ ළඟින්ම නතර වුණා .

” ඇතිද උඹ දුවලා බේරෙන්න හැදුවා ….

දැන් පලයන්කෝ මගෙන් බේරිලා ….”

එහෙම කියලා ඒ කෙල්ලගේ කම්මුලකට වැරෙන් පහරක් දුන්නේ මටවත් හිතා ගන්න බැරි වෙන්න .

ඒ වැදුණු පාරට කෙල්ල වීසි වෙලා වගේ ගියත් වැටෙන්නේ නැතුව බේරුණේ මම ඒකිගේ අත් දෙකෙන්ම අල්ලන් හිටපු හින්දා .

” අත ඇරපන් මාව….මට මේ මිනිහත් එක්ක යන්න බෑ ….”

මගේ අතින් ඒ කෙල්ලගේ අත මුදව ගන්න උත්සාහ කරන ගමන්ම ඒ කෙල්ල අඬන්න පටන් ගත්තා .

” දැක්කා නේද දරුවෝ මේ කෙල්ල තමන්ගේ තාත්තාට කතා කරන විදිය …

ඉඳපන් අද මම උඹට …..”

එහෙම කියලා ආයෙමත් කම්මුල් පාරක් ගැහුවා .වැදුණු පාරවල් වලට කම්මුල් දෙකම රතු වෙලා ඉඳිමිලා තිබුණත් මට ඒ කෙල්ලව අත අරින්න හිතුණෙම නෑ .

” තාත්තා …..කවුද තාත්තා ….

උඹ ඒ වචනෙවත් කියන්න එපා මිනිහෝ….”

කොච්චර ගුටි කෑවත් කෙල්ලත් කට වහන පාටක් තිබුණෙම නෑ .එකට එකම කියාගෙන ගියා .

” යමන්කෝ අද ගෙදර .. . උඹට මම අද තාත්තා කවුද කියලා කියල දෙන්නම්….”

” තාත්තා ….මහ ලොකු තාත්තා ….

මගේ අම්මා කසාද බැන්ද පලියට උඹ හිතුවද යකෝ උඹට මගෙ තාත්තා වෙන්න පුළුවන් කියලා …..

නෑ…නෑ …නෑ ….

උඹ කවදාවත් මගෙ තාත්තා වෙන්නේ නෑ ….”

” කට වහපන් බැල්ලී….උඹගේ සද්දේ වැඩියි හොඳටම ….”

ඒ මිනිහත් බැන බැනම පහර පිට පහර කම්මුල් පාරවල් දෙද්දිත් මට ඒ කෙල්ල ගැන අනුකම්පාවක් ඇති වුණේම නෑ .

” තරූ….මොකද බං මේ….මොකද මෙතන වෙන්නේ….”

කලූ මං ළඟට දුවගෙන ආවේ බය වෙලා වගේ.ඒත් එක්කම නාලා ඉවර වෙලා කොල්ලො සෙට් එකම මම ඉන්න තැනට ආවා .

” නැහැ බං…මගේ අවුලක් නෙමෙයි …

මෙන්න මේ මේකි කොල්ලෙක් එක්ක පැනලා යද්දී තාත්තාට අහු වෙලා….

ඒ මනුස්සයා අල්ලන්න පන්නගෙන එද්දි මම මේ අල්ල ගත්තේ ….”

” කොල්ලෙක් එක්ක .. ඇයි මිනිහෝ බොරු කියන්නේ…..

මම පැනලා ගියේ කොල්ලෙක් එක්ක නෙමෙයි …. මෙන්න මේ තාත්තා කිය කිය කෑ ගහන අසහනකාරයගෙන්….”

” කවුද යකෝ අසහනකාරයා…කටවහපන් බැල්ලි….”

” නෑ මම කට වහන්නේ නෑ ….පුළුවන් නම් උඹ අද මාව නතර කරපන්…..

මාව මරල දැම්මත් උඹේ ආසාව ඉෂ්ඨ කරගන්න බෑ මිනිහෝ….

උඹ තමයි මගේ තාත්තා මරා ගත්තු මිනීමරුවා…..”

කෙල්ල අඬ අඬම වුණත් ඒ මිනිහට බැන්නේ ගොඩක් තරහින් වගේ.

” තරූ.. .අත ඇරපන් ඔය කෙල්ලව….පව් බං. බලපන් ඒකි ගුටි කන හැටි….'”

මනී එහෙම කිව්වත් මට අත අරින්න හිතුණේ නෑ ඒකිව.

” ඔයාලගේ මහ ලොකු යාළුවට කියන්න මේ විදියට මාව අල්ලන් ඉඳලා කරන්නේ ලොකු වැරැද්දක් කියලා ….

පිරිමි ඔක්කොම එකයි…..කෙල්ලෙක් දැක්කම ඇඳකට අරන් යන්න දඟලන අසහනකාරයෝ තොපි….”

අඬ අඬම ඒ කෙල්ල මටත් බැන්නා .

” මොකක්ද උඹ කිව්වේ ….මමද එතකොට අසහනකාරයා ….”

මම ඒ කෙල්ලගේ අත් දෙකම අත ඇරලා හිතේ තිබුණු කේන්තියට අර මිනිහටත් වඩා වේගවත් කම්මුල් පාරක් ගැහුවා .

” තරූ…උඹට පිස්සුද …කෙල්ලෙක්ට අත උස්සන්න මේ විදියට ….

වරෙන් මෙහාට.. ”

යාළුවෝ මාව ඇදලා ගත්තේ නැත්නම් මම තවත් පාරක් දෙනවා ඒකි කියපු කතාවට.

” උඹ එකක් මතක තියා ගනින්….

අද මගේ ජීවිතේට මොකක්ම හරි වුණොත් ඒකට උඹයි වග කියන්න ඕන ….

මම මුගෙන් බේරිලා පැනලා යද්දී උඹනෙ වීරයා වෙලා මාව අල්ලලා දුන්නේ ….

උඹටත් ඕන මම මූත් එක්ක ඇඳක් උඩට යනවා බලන්න වෙන්න ඇතිනේ …..

සතුටු වෙයන් දැන්….උඹට ඒකනේ කරන්න ඕන වුණේ …..”

මගේ ශර්ට් එකෙන් ඇදගෙන ඒ කෙල්ල බැනගෙන බැනගෙන යද්දී මට හිතා ගන්න බැරි වුණා වැරදි මමද,අර මිනිහද, එහෙමත් නැත්නම් මේ කෙල්ල ද කියලා .

ලද අවසරයෙන් අපෙනුත් අර මිනිහගෙනුත් පැන ගත්තු කෙල්ල එක පාරටම දුවන්න ගත්තත් අර මිනිහත් ඒ පස්සෙන්ම දුවගෙන ගියා .

” තරුවා….උඹ ඒ කරපු වැඩේ වැරදියි බං….මට හිතෙන්නේ ඒ අහිංසක කෙල්ලෙක් ….”

අපි හැමෝම බලාගෙන හිටියේ දුවන කෙල්ල දිහාම.

එක පාරටම දුවන එක නතර කරපු කෙල්ල බිම තිබුණු වීදුරු බෝතලයක් ඇහිදලා අරගෙන එතනම තිබුණු පොල් ගස් කඳකට ගහලා ඒක කඩා ගන්නවා දැක්කා .

ඊටත් පස්සේ බිඳුණු බෝතල් උල ඇයගේ පැත්තට හරවන් අර මිනිහට කෑ ගැහුවේ ළඟට එන්න එපා කියලා .

” මනියෝ….

අර බලපන් බං…..

මට හිතෙන්නෙම අර කෙල්ල ඇන ගනීවි කියලමයි….”

කලූ එහෙම කියනවත් එක්කම මාත් ගොඩක් කලබල වුණා .එහෙම දෙයක් වුණොත් කෙල්ල කියපු විදියට ඒ හැමදේකටම වග කියන්න වෙන්නේ මට.

මමයි ඒ කෙල්ලට යන්න නොදී අර මිනිහට අල්ලලා දුන්නේ .මගේ අතින් වුණේ ලොකු වරදක් කියන හැඟීමක් මගේ හිතට දැනුණා ඒ වෙලාවේ.

අපිට හිතන්න වත් වෙලාවක් ඉතිරි වුණේ නෑ .අර මිනිහා ළන් වෙනවත් එක්කම අතේ තිබුණු බිඳුණු බෝතල් කැබැල්ලෙන් ඇයම ඇගේ කුස ප්‍රදේශයට ඇන ගත්තා .

ඒකෙන් බය වුණු අර මිනිහා කෙල්ලව අත ඇරලා පැනලා දිව්වෙත් අපි හැමෝම කෙල්ල ළඟට දිව්වෙත් එකම මොහොතක වගේ.

කුස දිගේ ලේ බේරි බේරිම ඒ කෙල්ල දුවගෙන ගියේ මුහුද පැත්තට .

ඇයගේ ඉණ හරියටත් වඩා වතුර මට්ටමකට ඇය මුහුදට ගිහිල්ලයි හිටියේ .

ඇයගේ කුසින් ගලාගෙන ගියපු ලේ නිසා ඇය වටා තිබුණු මුහුදු දිය රත් පැහැ වෙලයො තිබුණේ .

” තරූ….කෙල්ලව අරගනින්….ඒකි මැරෙයි බං…”

මම වගේම කලූ මනී හැමෝම බය වෙලයි හිටියේ .අපි හදවතින්ම බැඳිලයි ඉන්නේ මිනිස්සුන්ගේ ජීවිත බේර ගන්න .

මම මුහුදට පැනලා කෙල්ලව අල්ල ගත්තේ ඒකිට මං නිසා මැරෙන්න දෙන්න බැරි හින්දා .

” අත ඇරපන් මාව…..

පව්කාරයා උඹ ….පව්කාරයා…

මට මැරෙන්න වත් දීපන් නිදහසේ ….”

මගේ අත ගහලා දාලා අඬ අඬම කෑ ගහද්දි මම ඒකිට මුකුත්ම කිව්වේ නැත්තේ මේ වෙලාවේ මොනවා කිව්වත් ඒකි ඉන්න තත්වෙත් එක්ක වැඩක් නැති නිසා .

බලෙන්ම වගේ මං ඒකිව ගොඩට ඇදගෙන ආවත් ඇය සිහි සුන්ව ගියේ කුස ප්‍රදේශයෙන් වැඩියෙන් ලේ ගියපු නිසා .

මතු සම්බන්ධයි