“අ…අයි…යේ ඔයා …මේ..”

කෞෂාල් ඇගේ මුව මත් අත තබමින් ඈ නවතාලීය.

ඔහු හා වාද කිරීමට හෝ ශක්තියක් නොවුණු ඈ ඔහුට ඉඩහැරියාය.දෙදෙනා තනිව කතාබහකට ඉඩහළ ශනීෂා , කුටියෙහි දොරටුව අභිමුව හුන් අෂාන්වද කැටුව ඉවතට ගියාය .මොහොතක් එලෙසම හුන් ඔහු ඇයව ඇමතුවේය.

“මං ගැන මටත් වඩා ඔයා හිතනවා කියලා මං දන්නවා …දැන්නම් මට ඔයා නැති තැන සතුටක් නෑ දෝණි … මං දන්නවා ඔයා මගෙන් යන්න හදන්නේ කැමැත්තෙන් නෙවෙයි කියලා ..”

කෞෂාල් පැවසුවේ ඇයව තමා වෙත හරවාගනිමිනි.

“මාව තේරුම්ගන්න අයියේ…ඒත් අයියේ මගේ අතීතයෙන් කවදාවත් මට ගැලවෙන්න බෑ …මගේ ජීවිතේ දැනටමත් විනාශ වෙලා ඉවරයි .ඒත් මං ඔයා ළඟ හිටියොත් ඔයාත් ජීවිත කාලේම දුක් විඳියි…ඒ නිසා මං ඈත් වෙන්නම් …”

“අනේ ආශා… මං ඔයාට කියලා තියනවා මට ඒ දේවල්වලින් වැඩක් නෑ කියලා.. මට ඕනි ඔයා මං ගාවින්ම තියාගෙන පරිස්සමෙන් බලාගන්න.. ඔය ඇස්වලට ආයේ කඳුලක් දෙන්න මං කැමති නෑ..”

“දුක කියන දේ මට නුහුරු දෙයක් නෙවෙයිනේ.අයියාට සතුටින් ඒ රටට ගිහින් වැඩ ටික කරගන්න පුළුවන් මං ඈත් වුනාම..”

“ඔයා දුකින් තියලා මං එහෙ ගිහින් හිත හදාගෙන වැඩ කරන්නේ කොහොමද? දෙන්නා රටවල් දෙකේ ඉඳලා විඳවනවා කියලා ඔයා හොදටම දන්නවා ..කොච්චර කිව්වත් ඔයා මට ආදරෙයි කියලාත් මං දන්නවා..”

ආශා ලැජ්ජාවෙන් දෙනෙත් පහතට යොමු කලෙන් හේ ඇගේ දෑත් සිය දෑතින් මුදුව අල්වාගත්තේය .

“මගේ දෝණි ..ඔයාගෙ සතුට වෙනුවෙන් මට හැමදේම කැපකරන්න පුළුවන් … මොකද මං දෝණිට පණ තරම් ආදරේ කරනවා.කියන්න මගෙන් ඈත් වෙන්නේ නෑ නේද …”

“අනේ අයියේ.. මටත් ඕනි අයියා ගාවින්ම ඉන්න…ඒත් මං .. ”

“ඒ හොඳටම ඇති මගේ මැණික …”
ඇයට තවදුරටත් පැවසීමට ඉඩ නුදුන් ඔහු ඈ තමා වෙත තුරුළු කරගත්තේය .

*****************************************

” චූටි පුතේ … ඔයා අර දරුවා ගැන අදහසක් තියාගෙන ඉන්නවා නම් ඒ දරුවත් පුතාට කැමතියි නම් මෙහෙම ඔක්කෝම දාලා යන එක හරි ද ?”

“මට තේරෙනවා අප්පච්චි … ඒත් මං යන්නේ එහෙ නවතින්න නෙවෙයි. මං එහෙ කරපු ජොබ් එක පිලිවෙලක් කරලා එන්න ඕනිනේ….”

“අනේ මන්දා පුතේ..පොඩ්ඩක් හිතලා බලන්නකෝ … එතකොට පුතා කවදා විතරද යන්නේ .දැන් ටිකට් එහෙම වෙන් කරගත්තද. ”

“අප්පච්චි මං හිතාගෙන ඉන්නේ ලබන සතියේම ගිහින් එන්න .. මං අද හවස හැමදේම ලෑස්ති කරගන්නම්”

මව්ගේ පෙරැත්තය මත දෙදිනක සිට ආශා සහ කෞෂාල් සිටියේ සිය මව්පියන් විසූ නිවසෙහි ය. පිය පුතු දෙපළ කතා කරමින් සිටියදී මෑණියන් එතැනට පැමිණියාය .

“අප්පච්චිට විතරක් නෙවෙයි චූටි … මටත් දෙයක් තියනවා ඔයාට කියන්න ..”

“ඒ මොකක්ද අම්මේ …”

“පුතා දැන් පොඩි ළමයෙක් නෙවෙයිනේ .. අනික මං දන්නවා මගේ පුතා ආයේ කවදාවත් වැරදි දෙයක් කරන්නේ නෑ කියලා …ආශා ගොඩක් අහිංසක දරුවෙක්.. දැන් ඒ කෙල්ල මට මගේම දුවක් වගේ.. දිල්කි ඔයාට දුන්නු වේදනාව ඒ දරුවවත් මගේ පුතාවත් ආයේ විඳිනවාට මං කැමති නෑ පුතේ.. ඒ නිසයි මං සම්බන්ධෙට අකැමැත්තක් නැත්තේ… මොකද මං දන්නවා මගේ පුතා එහෙම කෙනෙක් නෙවෙයි කියලා ..ඒත් ගිනි පෙනෙල්ලෙන් බැට කෑවම කණාමැදිරි එළියටත් බය හිතෙනවා පුතේ …

“නෑ අම්මේ … කොහොමටවත් මගේ අතින් එහෙම දෙයක් වෙන්නේ නෑ .මං එයාට වගේම අම්මටත් ඒ ගැන පොරොන්දු වෙන්නම්”

“ඒවගේම තව දෙයක්… පුතා ඒ දරුවට ටිකක් පැහැදිලි කරලා දෙන්න ඔයා ඉක්මනට එනවා කියලා .. මට හිතන්නේ කෙල්ල ගොඩක් හිත්වේදනාවෙන් ඉන්නේ ඔයා යන නිසා ”

ඊට පිලිතුරු නොදුන් හේ සිය කුටියට වැදී මොහොතක් ගතකර නගරය වෙත පිටත්ව ගියේය.

*********************************************

කෞෂාල් නැවත පැමිණෙන විට රාත්‍රිය එළඹ තිබූ අතර ආශා සිටියේ යහන මත සිය සොයුරුගේ සය හැවිරිදි පුතු මිතූෂ සමඟින් සෙල්ලම් කරමිනි . ඔහු සෙමෙන් කුටිය වෙත ඇතුල් වී ඒ වෙත ගමන් කලේය .

“චූටි බාප්පි … ඔයත් එනවද අපිත් එක්ක අතුරු මිතුරු කරන්න … ”

“අනේ මිතූ… මං දන්නේ නෑනේ එහෙම සෙල්ලමක්…”

“මටත් පුංචි තමයි කියලා දුන්නේ බාප්පි … එන්නකෝ මං කියලා දෙන්න ..”

“අහන්නකෝ පුතේ… අපි හෙට සෙල්ලම් කරමුද..බාප්පිට දැන් ගොඩක් මහන්සි . ”

“ඔයා නම් හොද නෑ බාප්පි … මං දන්නවා මාව යවන්නේ ඔයාට පුංචි එක්ක සෙල්ලම් කරන්න කියලා … ඉන්නකෝ මං ආච්චිට කියනවා …”

කුඩා දරුවා දිවගියේ හුරතල් ලෙස මුව පෙරලා පවසමිනි .

“පැහිච්ච කොල්ලා ….”

“අනේ ඇයි අයියේ යැව්වේ එයාව. පව් නේ ඒ දරුවා ….”

“එතකොට මට කියන්නේ පොඩි එකාව ළඟ තියාගෙන මගේ කෙල්ල එක්ක කතා කරන්න කියලා ….”

“මාත් එක්ක මොනවා කතා කරන්නද ඉතින් …”

ආශා දෙනෙත් පොලොවට බර කරගත්තාය.ඔහු යහන මත හිඳි ඈ අසලින්ම හිඳගත්තේය.

“ආශා… අනේ ඉතින් ..මූණ එල්ලගත්තා නේද .”

තවමත් ඈ නිහඬය.

“අනේ මැණික … කියන්නකෝ මොනවාහරි … මාත් එක්ක තරහයිද..ඕන් කතා කලේ නැත්නම් මං අදම යනවා යන්න..”

එය ඇසෙද්දීම මදක් හිස එසවූ ඈ ඔහුගේ උරහිස මත හිස හොවාගත්තේ ඉකිබිදීමිනි.

“අනේ අයියේ … එහෙම කරන්න එපා … ඔයත් මාව දාලා ගියාම කවුද මට ඉන්නේ.. මං ආයේ තනිවෙනවා අයියේ ”

ඔහු ඇගේ ගෙල වටා සිය අත යොමා ඈව තමා වෙත ළං කරගත්තේය.

“මගේ පිස්සු කෙල්ල … එච්චර ආදරෙයිද මට … ”

“මං දන්නේ නෑ …”

“ඔයා ඒක කීවොත් පොඩි බඩ්ඩක් දෙනවා මං ..අනික අයියා ආසයිනේ ඔයාගෙන් එහෙම අහන්න.අනේ කියන්නකෝ එකපාරක්..ප්ලීස්.ප්ලීස්…”

“ම්..මං ආ… ආදරෙයි අයි..අයියට….”

“මොකක්ද … මට හරියට ඇහුණේ නෑනේ.. කෝ කෝ ආයේ කියන්න බලන්න..ඒක කිව්වේ නැත්තන් දෙන්නේ නෑ අර දේ හොදද..”

“අනේ ඉතින් … මං මගේ අයියට ගොඩක් ආදරෙයිනේ .. ඔයා ඔච්චර කියන දේ මොකක්ද අයියේ … පෙන්නන්නකෝ…”

ඔහු සිය බෑගයෙන් ගත් ගුවන් ටිකට්පත් දෙකක් ඈ වෙත පෑවේය .විශ්මයට පත් ආශා ඒ කුමටදැයි අසන්නාක් වැනි බැල්මක් කෞෂාල් වෙත හෙලීය.

“දෝණිට වගේම මටත් ඉන්න බෑ මගේ කෙල්ලගෙන් ඈත් වෙලා … මට එහෙ නොයත් බෑ … ඒ වගේම දෝණි දාලා යන්නත් බෑ … මං ඔයාට පොරොන්දු වුනානේ ඔයාව මං ගාවින්ම තියාගන්නම් කියලා .. ”

“ඒත් අයියේ … එහෙම හරිද… අපි දෙන්නා තාම කසාද බැඳලා නෑනේ ”

“මෙයා හිතලා තියන දුර .ඇයි මාව සැකයිද…මගේ අපාය සහායක මිත්‍රයා එයාගේ ප්‍රියම්බිකාව එක්ක එනවා අපි එක්ක .අපි නිසා ඒ දෙන්නටත් සතුටක් තිබුණේ නෑනේ .මං එයාලාව එකතුකරගන්න හිතුවා..ආහ් අපි මෙහෙම කරමු.. අපි යන්න කලින් එන්ගේජ් වෙමු..එතකොට කාගෙන්වත් කතා අහන්න ඕනි නෑනේ මගේ කෙල්ලට… දැන් හරි නේද ..”

කෞෂාල් ඇගේ කනක් මිරිකමින් පැවසුවේය.

“ආව් අයියේ .. රිදුනා …අයියේ මේක හීනයක් ද.. මට හිතාගන්න බෑ මාත් ඔයා එක්ක එහෙ යනවා කියලා … ”

දිනගණනාවක් සැඟවී තිබුණු ඇගේ දඟකාර සිනහව මුවගින් නැගුණෙන් හේ ඈ දෙස බලාගත් වනම බලාසිටියේය. ඒ දුටු ආශා ලැජ්ජාවෙන් එසැනින් ඔහුගේ පපුතුරේ මුහුණ සඟවා ගත්තීය.මොහොතකට පසු එහි නොවැසුණු දොරටුවෙන් මෑත් වූයේ අෂාන් සහ ශනීෂා ම විය.

“මේ… මිස්ටර් කෞෂාල් මුණගැහෙන්න පුළුවන්ද …”

අෂාන් විමසුවේ සිනහසෙමිනි.ආශා ඉක්මනින් කෞෂාල්ගෙන් ඈත් වූවාය.

“අප්පෝ උඹලානම්.. කාමරේකට එද්දී කියලා එන්න දන්නේ නැද්ද …”

” අනේ මේ කෞෂාල් .. කියලා එන්න උඹලා බදාගෙන ඉඹගෙන ඉන්නවා කියලා අපි දන්නවද.. අනිත් එක අපි බබාලානේ නේද ශානු මේවා දැකලා බයවෙන්න …”

“මං මුකුත් කියන්නේ නෑ අෂාන් උඹට ..ඒකනෙවෙයි.. ඇයි දැන් මේ අපිව මතක්වෙලා මේ දෙන්නට…”

“මේවා දැක්කම ඒකත් අමතක වුනානේ.. මචන් මට කියන්න දෙයක් තියනවා… ”

ඔහු කෞෂාල්ව කුටියෙන් පිටතට කැදවාගෙන පැමිණ දුරකථනය මිතුරාගේ මුහුණට එල්ල කලේය. එහි වූයේ රෝහිතගේ ඡායාරූපයකි. කෞෂාල්ගෙ මුහුණේ ප්‍රශ්නාර්ථයක් සටහන් විණි.

” උඹ කොහොමද බන් මූව දන්නේ.. තිරිසනා.. අනික එකපාරටම මොකද…”

“ඒකව දැකලා නැති උනාට නිවුස් එකේ ඌ ගැන කියද්දි මං අදුනගත්තා..උගේ ජරා බිස්නස් එක පොලිසියට අහුවෙලා .. පොලිසියෙන් බේරෙන්න පැනලා යද්දී ලොරියකට හැප්පිලා එතැනම ඉවරයි… ඉනෙන් පහල කෑලිවත් නෑ කියලා තමයි ආරංචිය.. ඌ කරපු පව් ගෙව්වා මචන් .. ආශා වගේ කී දෙනෙක් විඳවන්න ඇතිද ඒකා හින්දා …”

කිසිවක් නොපැවසූ කෞෂාල් දිගු සුසුමක් හෙලුවේය.

*************************************************
ගතවූ තෙමස තුළ ආශා කෙමෙන් සුව අතට පැමිණ තිබුණාය.එහෙයින් විදේශ ගමන ඇයට අපහසුතාවයක් නොවුනේය. සති දෙකක කාලයක් එහි සතුටු දායක නිවාඩුවක් ගතකල සිව්දෙනා ලංකාවට පැමිණ මසකින් පමණ දිනයකදී ආශා සහ කෞෂාල් යුග දිවියට පත්වූහ.කෞෂාල් සිය විදේශ රැකියාව අතහැර ඇඳුම් අලෙවිසැල වෙත පූර්ණ අවධානය යොමු කලේය.

( දෙවසරකින් පසු )

?” හෙලෝ කෞෂාල් … වැඩකද ඉන්නේ …”

“අයියේ… මොකක්හරි ප්‍රශ්නයක්ද.. දැන් තමයි මගේ මීට්න් එක ඉවර වුනේ…”

” හරි මල්ලි … ඉක්මනට ගෙදර එන්නකෝ…”

සොයුරාගේ ඇමතීම කුතුහලයක් වූයෙන් ඔහුගේ සිත මදක් කැළඹී ගියේය..මේ වනවිටත් සම්පූර්ණයෙන් සුවය ලබාසිටි සිය බිරිඳ පිළිබඳ යම් බියක් ඔහු තුළ හටගත්තෙන් හැකි විගස නිවසට පැමිණියේය.

ඔහු පැමිණෙන විට සොයුරා සිය බිරිඳ හා මිතූෂ ද, අෂාන් ශානු හා වසරක් වයසැති ඔවුන්ගේ කුළුදුල් දියණිය නෙතුකි ද ආශාද ආලින්දයේ රැස්ව සිටියහ. කෞෂාල් නිවසට පාතබද්දීම මිතූෂ දිවගොස් ඔහුගේ ඇගේ එල්ලුනේය.

“චූටි බාප්පි … අපේ පුංචි මට මල්ලි බබෙක් ගේන්නලු යන්නේ … අපෙ අප්පච්චි කීවා කාටවත් කියන්න එපා කියලා … ඒත් මං බාප්පිට කීවා..”

පුතුව සියතට ගෙන සිපගත් හේ කඳුළු පිරි දෙනෙතින් යුතුව ආශා වෙන පියමැන ඈ අසලින් දරුවා බිමින් තැබීය.ආශා මෙතෙක් පහතට යොමු කර සිටි වත සෙමෙන් එසවූවාය.

“මිතූ කියන්නේ ඇත්තක්ද මගේ මැණික … මං අප්පච්චි කෙනෙක් වෙන්නද යන්නේ …”

“ඔව් මගේ මහත්තයා… එයා ඇවිත් අපි ළඟට.. අපේ ජීවිතේට තවතවත් සතුට දෙන්න චූටි පැටියෙක් අපි ළඟට ඇවිල්ලා ..”

“දන්නවද දෝණි මට අද කොයිතරම් සතුටුයිද කියලා…ඔයා මට ජීවිතේ ගොඩක් වටිනා තෑග්ගක් අරන් ඇවිත් .. තවත් සුභ ආරංචියක් තියනවා… අපේම කියලා ගාමන්ට් එකක් කරන්න අද මීට්න් එකේදී තීරණය වුනා .. ඉතින් මැණික .. ගොඩක් පින් මගේ ජීවිතේට ආයෙම සතුට අරන් ආවාට..”

ඔහු ආශාගේ නළලත සියුම්ව හාදුවක් තබා ඇයව ඔසවා ගත්තේ මහත් සතුටකිනි.

“ඒයි මෝඩයෝ… ඔය කෙල්ල පරිස්සමෙන් බිමින් තියනවා … පුදුම දාංඟලයක් නේ තාම තියෙන්නේ ..”

සොහොයුරා ඔහුට ඇනුම්පද කියන විට අෂාන් ඔහුව නවතාලිය.

“අදට ඔහොම කියන්න දෙන්න අයියේ .. දැන් ඉතින් ආයේ දෝණි කියලා හුරතල් කරන්න ලැබෙන්නේ නෑනේ පොරට.. දෝණියෙක්ගේ අම්මා වෙන්න හිතාගෙන ඉන්නේ කෙල්ල දැන් … ”

“දෝණි කිව්වම මොකද දෝණිගේ අම්මා කිව්වම මොකද නේද මැණික…”

ආශා සෙමෙන් තැබූ හේ ඈ දෙස ආදරණීය ලෙස බලා ඇගේ හිස පිරිමැද්දේය.

????????
නොසිතූ හමුවක් ලෙසින්
ළං වුනේ කෙලෙසකින්
පෙමින් බැද අහම්බෙන්
දිවිය සුවපත් කලෙන්

පෙර දවස හැරලමින්
මතු දිවි ගැන සිතමින්
නොහැර සසරේ ආදරෙන්
ඉන්නම් ඔබ ගාවින් මං ..

?? කෞෂාල් ??

අදුරු වූ දිවි අත දරන්
මුණගැසුණු මා ආදරෙන්
රැකියේ නුඹ පණ ලෙසින්
ණයගැතිය මගේ දිවියෙන්

පෙර මතක දුරලමින්
ඔබේ සෙවණේ රැදෙමින්
ඔබේ සතුට මම ම නම්
ඉන්නම් ඔබ ගාවින් මං …

?? ආශා ??

* * * * * * * * ? ? නිමි ? ? * * * * * * * * *

දඟ යාළුවනේ මගේ පළවෙනි කතාවේ අවසානය මේ… මං පසුවදනක් නම් ලියන්නේ නැහැ … ඒක මගේ දඟ යාළුවෝන්ට බාරයි …

ගොඩක් ස්තූති මාත් එක්ක අවසානය තෙක් එකතු වෙලා හිටිය මට හයියක් වුනු ලොකු අයියා, මගේ අක්කිලා ඇතුළු දඟ පැටව් ඔක්කොටම ..??
ඒ වගේම මගේ කතාව කලින්ම කියවලා අකුරු අඩුපාඩු , වචන නොගැලපීම් පෙන්නලා මට හයියක් වුනු මගේ නංගි ( ඔයාලාගේ මාෂි ) ඔයාටත්…???
ඉතින් යාළුවනේ … මං නවතින්නම්
දළදා සමිදුන්ගේ පිහිටයි දඟයෝ හැමෝටම ….

? නිෂූ ?