මැණිකා එන බව ඇසුන විගස දුන්‍යා සැනෙකින් ඇදට වැටී වඩ වඩාත් කෙඳිරි ගෑවේ ඇගේ දුර්වලකමින් ප්‍රයෝජනයක් ගැනීමට බවද මැනිකා නොදත්තා ය.

………………………………….

“ලොකූ.. මගේ පුතේ…මගේ අම්මට මහන්සි ද.. ඇය සිය වැඩිමල් දියණියගේ හිස අතගාන ගමන් ඇසුවා ය.තම සිරුර දිගේ දැවිල්ලක් ඇදෙන බව දැනී ඉද්ද ගැසුවාක් මෙන් ඇඳ උඩ හිටගත් දුන්‍යා මවට පයින් ගැසුවා ය. ඒ පා පහර වැදී මැණිකාගේ ඉනට බැදි සුරය ගිලිහී බිම වැටුණේ ඇයගේම කරුමයට ය.

“හහ් හහ් හා.. තොපි අපිව මට්ටු කරන්න නේද හැදුවේ. හිටපන් මං තොපි එක එකාව මට්ටු කරවන්න.!” එසේ කියමින් ඈ මැණිකාගේ කෙස් වැටියෙන් අල්ලා ඇයව ඇඳ මත පෙරලා දැමුවා ය. මැණිකාගේ හිස ඇඳ විට්ටමේ වැදී ලේ ගලන්නට විය.කෑගැසූ මැනිකාගේ හඬ ඇසී රාජාද අවදි වී කාමරයට දුවගෙන ආවේ ය. එහිදී දුටු දෙයින් ඔහුගේ ඇස් උඩ ගියේ ය.

දුන්‍යා ඇඳ ඉස්සරහ පාවෙමින් සිටි අතර මැණිකා රැගත් ඇඳ වේගයෙන් භ්‍රමණය විය. මැනිකාගේ හිසෙන් ගලන රුධිරය කාමරය පුරා විසිරුනේ රාජාගේ ඇඟට ද ඉසීමෙනි.

“අනේ පුතේ නවත්තන්න රත්තරනේ ඕක නවත්තන්න.”

“හහ් හහ් හා නවත්තන්න? තොපි මට්ටු කරන්න නේද හැදුවේ මේ අපිව. මේ බලපං මේකිට කරන දේ.හහ් හහ් හා.”

එසේ කියූ ඇය භ්‍රමණය නවතා මැණිකාගෙ ගෙල ටිකෙන්ටික මිරිකන්නට විය ..ශබ්දය ඇසී අවදි වූ නිත්‍යා ද රාජා ලඟට දුවගෙන ආවා ය. නිත්‍යා පසෙකට තල්ලු කර රාජා මැණිකා වෙත දුවගෙන එනවාත් සමඟම ඇඳ වේගයෙන් යළිත් ඉහලට එසවිණි.සිහිසුන් වූ මැනිකාගේ හිසෙන් ගලන රුධිරය දුන්‍යා ලෙව කෑවෙ ආශාවෙන්‍ ය.

“අනේ එපා මගෙ දුවේ එපා.. මේ උබෙ අම්මා නෙ.. එයාට කිසි දෙයක් කරන්න එපා දුවේ.. අත අරින්න අම්මව..!”

රාජා හඬමින් පවසා උදව්ද්ද ඉල්ලා අසල්වැසියන්ට කෑ ගැසුවද මේ අවස්ථාවට සහභාගී වීමට ඔවුන් අකැමැති විය.

“හහ් හහ් හා..උඹලා බේරගන්න ඔය මොකෙක් වත් එන්නෙ නෑ. මේ පොඩි එකෝ.. උඹට ඕන අම්මව බේරගන්න නේද? ..එහෙනම් උඹේ බෙල්ලෙ තියෙන සුරේ ගලවපන්.!” ඇය නිත්‍යාට කීවා ය..

“එපා දූ එපා.. චූටි දූ එපා.. ගලවන්න එපා පුතේ..”

රාජා කෑගැසුවත් බියවී සිටි කෙල්ලට අවශ්‍ය වූයේ අම්මා බේරගැනීමටය. ඇය ක්ශනයකින් සුරය හිසෙන් පන්නා දැමුවා ය. දුන්‍යා ඇගේ මව ව අතැර නිත්‍යා වෙත පාවුනේ තත්පරෙන් තුනෙන් පංගුවක වේගයකිනි. රාජාට පෙනුනේ මැණිකා අසල මෙන්ම නිත්‍යා අසලද දුන්‍යා සිටින බවක් ය. කවුරුන් බේරාගන්න ඕනීදැයි රාජා වික්ෂිප්ත විය.

දහවල් ආහාරයට ගැනීමට නොහැකි වූ ගොදුර තමා අතට පත්වීම ගැන දුන්‍යාගෙ ඇග තුල සිටි ආත්මයන් මහත් සේ සතුටු විය.. ආශාවෙන් තොල කට ලෙව කාපු යක්ශ මුහුණු කීපයක් දුන්‍යා තුළින් මැවි මැවී අතුරුදන් වූයේ ද විනාඩියකටත් අඩු කාලයක් තුළ ය.. දොඹගෙඩි මෙන් විශාලව රතු වූ ඇස්ද උල් දත් දෙකක්ද ඇති යකෙකු ද නයි හිසක් ඇති රුවක් ද දිගු කන් දෙකක් හා උස අං දෙකක් තිබුන රුවක්ද ඒ අතර විය. එපමණක්ම නොව ඇගේ සිරුර වරෙක ඇය මෙන් තුන් ගුණයක් පමණ විශාල විය හම පැලී රුධිරය ගලන්න ට විය…ඇය තුල අරක් ගත් ආත්මයන් සිත් සේ රාජාගේ හැඟීම් බයිටට ගන්නට විය.එම භයානක රූපයන් දැක්ක පුංචි නිත්‍යා සිහි විසඥ්ඥව ඇද වැටුනේ දුන්‍යාගෙම අත් මත ය.ඇය තුල එක් යකෙකු පිටතට විත් නිත්‍යාව අයිති කර ගැනීමට ඇයව උදුරාගන්නට වූ අතර තවකෙකු ඇගේ අත සිදුටු කර ලේ උරාබොන්නට විය.

රාජා සිහිමද වූවෙකු සේ ගේ පුරා දුව ගෙන ගොස් අතට හසු වූ මන්නයක් රැගෙන ආවේ තම කුඩා දියණිය කෙසේ හෝ බේරා ගන්නට ය.එක් දියණියකගේ ජීවිතය බේරා ගැනීමට අනික් දියණියට මන්නයෙන් කෙටීමට සිදු වීම මොනවගේ හැඟීමක් දැයි කිව නොහැකි ය. කෙසේ උවත් තමාගෙ තත්පරයක පරක්කුව සියල්ලන්ගේම ජීවිත මෙන්ම ගම්වැසියන්ගේ ජීවිත වලටද තර්ජනයක් වන හෙයින් ඔහු දෑස් තර කොට වසා මන්නය ඉහලට එසවූයේ දුන්‍යාගේ දෑත් වලට ගැසීමට ය. එවිටම වාගේ ඉදිරිපස දොර පලු කඩාගෙන ගෙතුළට ආපු කපු මහතා නිසා රාජාගෙ ක්‍රියාව නැවතිණි.කපු මහතා යලිත් මන්ත්‍ර මතුරා දුන්‍යාව මෙල්ල කර ගත්තේ මහත් වෑයමක් දරා ය..දුන්‍යාගෙ නිවසේ කලබලය ඇසුනු අසල නිවසකින් ඔහුව ගෙන්වා තිබුණේ ය ..

කඹ කිහිපයක් ගෙන්වාගත් කපු මහතා දුන්‍යා ඇඳටම තබා අත් පා ගැට ගසා දැමූවේ වෙන කරන්නට දෙයක් නැති නිසාය ..මැනිකාට වතුර ඉස සිහිය ගත් අතර වාසනාවකට ඇයට බරපතල තුවාලයක් නොවීය. රුදිරයද කැටවී ගැලීම නැවතී තිබිණි.කාමරය පුරා හා රාජාගේ ඇඟටද විසි වූ මැනිකාගෙ රුධිරය මායාවක් සේ අතුරුදහන් වී තිබිණි.

“රාජා මම කිව්ව නේද පරිස්සම් වෙන්න කියලා.
බලන්න කෙල්ලගේ බෙල්ලෙ ඇප නූල නැහැ.

මැණිකාගෙ ඉනේ තියෙන සුරයත් නැහැ.මේක උනේ කොහොමද. අවධානයෙන් ඉන්න තිබුණා .ඒ දරුවාගේ ඇඟේ බලගතු ආත්ම..එකක් නෙවෙයි.. කීප දෙනෙක්..බන්දන!. ඒ නිසා බන්ධනය කපන්න හරි ආපිට හරවලා යවන්න හරි ඕන..මේ කාරණාව බරපතලයි. මං මගේ ඇදුරුතුමාව මේ කාරණාවට කතා කරගන්න හැදුවෙත් ඒකයි…හැබෙයි වියදම සැරයි රාජා..”

“ඒකට කමක් නෑ කීය ගියත් මගේ කෙල්ලව බේරලා දෙන්න කපුමහත්තයෝ ..” දුන්‍යා විදින වේදනාව මහන්සිය මතක් කරමින් රාජා කීවේ ඇස් වල කදුළු පුරවන්‍ ය.

————————————

කපුමහතා වරුවෙන් වරුව ඇප නූල අලුත් කල නිසා බදාදා වෙනකං කරදරයක් නැතිව නිවැසියන් සිටියද දුන්‍යාගේ හැසිරීම අමුතු අයුරින්ම තිබිණි.
සිවිලිම දෙස බලාගෙන දෙඩවීමත් ක්ලාන්තයෙන් මෙන් ඇදවැටීම කිහිප වරක්ම සිදු විය.ඇය කාමරයටම වී සිටි අතර ආහාර කිසිවක් නොගත්තා ය. වරෙක ඇගේ කාමරයේ බඩු මුට්ටු පෙරලෙන හඬද ගිරිය යටින් කෑ ගසන හඬද ඇසුණි.

බදාදා උදෑසනම කපු මහතාගෙ ඇඳුරුතුමා වු සේදිරිස් ගුරුන්නාන්සේ තවත් කපු මහතුන් දෙදෙනෙක් හා අත්වැසියන් දෙදෙනෙකුත් සමඟ රාජාගෙ නිවසට පැමිණ තොවිලය සඳහා පේ වී කටයුතු සූදානම් කළේ ය.

සැඳෑ අඳුර ගම්මානයට එබී බලන්නට කිට්ටුව ගමේ වැසියන් එකා දෙන්නා බැගින් රාජාගේ නිවසට ඇදුනේ මෙවන් සිදුවීමක් රස විඳීමට ඇති රුචියත් කුතුහලයත් බියට වඩා ඉස්සර වීමෙනි…මලහිරු ගම්මානයෙන් පිටව රාත්‍රී ය එළඹීමට පෙර ඇදුරන් සියලු දෙනා ගොක් පහන් පැල අසල රැස් වී බුදුන් වැද දෙවියන් පුදා ආශිර්වාදය ලබා ගත් හ. දොල තටුව ඉදිරියේ එලන ලද පන් පැදුරේ සුදුරෙද්දක් පොරවාගෙන දුන්‍යා සමඟ රාජාත් මැනිකාත් සිටි අතර නිත්‍යා තම ලොකු අම්මාගේ ඇකයේ ගුලි වී සිටියා ය.හක් ගෙඩිය පිඹ තොවිලය ආරම්භ කරන බව දැනුම් දී යක් බෙරය දවුල හොරණාව ආදී වාද්‍ය භාණ්ඩයෙන් සබ්ද පවත්වා පැය බාගයක් යාමට පෙර ගමේ ලොකු කුඩා සියලු දෙනාම පාහේ රාජාගේ ගෙමිදුලේ විය.

වර්ග හත බැගින් වූ තෙල් වලින් හැදූ රසකැවිලි, තුන් ආකාරයකට බැදගත් බිත්තර තුනක්, කුකුල් ලේ ගොටුවක්, අමු මස්, පිසූ මස්,අරක්කු,සුදු බත්, රතු බත්,දිය බත් ආදී දෑ රැසක් පිදේනි තටු වල තබා ඒ ඉදිරියේ මන්ත්‍ර ජප කල සේදිරිස් ගුරුන්නාන්සේ ආරූඪ වූයේ ය. වටේ සිටිය උන්ගේ ඇස් ගොබෙන් එලියට පනින කෙසෙල් මුව සේ ඇස් කෙවෙනි තුලින් එලියට පැන්නේ ඔහුගේ විලාශය ඒ තරම් බියකරු හෙයිනි. රක්ත වර්ණ ඇස් ලොඳ හා විකෘති ව පෙනුන මුව දැක බිය වේ යැයි සිතූ ගම්මුන් තම කුඩා දරුවන්ගේ දෙනෙත් අත් වලින් වසා දැමුහ.දුම්මලය අතට ගත් ගුරුන්නාන්සේ නොතේරෙන භාශා කීපෙකින් (උර්දු,තෙලිඟු, දෙමළ) කතා කරන විට ඔහුට ලං වන ගෝලයා ඔහු ඉල්ලන ඉල්ලන දෑ දුන්නේ කී දේ වැටහුණ නිසා නොව පලපුරුද්ද නිසා බව දන්නෝ දනිතත් අනිකුන් පුදුමයට පත් විය. එක් වරම ගුරුන්නාන්සේ උඩ පැන බිම වැටී වට තුනක් පෙරලීගොස් වත්ත පුරා මායිම් වල පෙරළි පෙරලී යන්නට විය. මඩ වලවල් කටු රොද ගල්තලා උඩින් පෙරලෙන ඔහු දිහා ගම්මු හැරි හැරී බැලී ය.

සුදු රෙද්දක් අතින් ගත් ඔහුගේ ගෝලයන් ද රාජාගේ නෑයින් කීප දෙනෙකුද ඔහු පසුපස ගොස් පෙන්වූ තැන් හාරා ගොඩගත් දෑ කඩිමුඩියේ පිදේනි තටුව වෙත ගෙනත් තැබී ය. පොට්ටනියක් සේ ඔවුන් රැගෙන ආ ද්‍රව්‍ය මොනවාදැයි බැලීමට එයට එබුන අවට වූවන්ගේ ඇස් ගෙඩි ටික් බෝල මෙන් දිස් විය.