කාලයත් එක්ක ගෙදර පරිසරය ටිකක් සන්සුන් වුණේ නංගිගේ තුන්මාසේ දානෙත් ඉවර වෙලා..ලියුම නිසා සමිත්ට හිරබාරයේ ඉන්න වුණත් ඒ දෙන්නා අතරේ සම්බන්ධයක් තිබුණා කියලා ඔප්පු කර ගන්න තරම් සාක්ෂියක් අපි ලග තිබුනේ නැහැ…

ජීවිතේ ගැන තීරණයක් ගන්න හොදම වෙලාව මේක කියලා මට හිතුනේ කැම්පස් යන්න තරම් රිසාල්ට් එකක් මට තිබුණත් තාත්තා ඒකට අකමැති වුණ නිසා..නිතරම බැරි වුණත් අහස්ව හොරෙන් හම්බෙන්න පුලුවන් වුණේ කවිදු අයියා නිසා..

“අම්මා..මට දෙයක් කතා කරන්න ඕනේ..”

“කියන්න පුතේ…ඇයි..”

“මට මැරි කරන්න ඕනේ අම්මේ..”

“මොකක් පිස්සු හැදිලද දරුවෝ..මොන විකාරයක්ද මේ..”

“විකාර නෙවෙයි අම්මා..ඇත්තටමයි කියන්නේ..”

“හ..හරි..කාවද දැන් බැදගන්න ඕනේ වෙලා තියෙන්නේ..”

“අහස්ව..”

“ඔලුව නරක් වෙලාද දරුවෝ..ඔය පවුලේ එවුන් නිසා අපිට වෙච්ච දේවල් මදි වෙලාද..ආහ්හ්හ්..”

“අම්මා…අහස් කියන්නේ නරක කොල්ලෙක් නෙවෙයි..ඇයි තේරුම් ගන්නේ නැත්තේ..”

“අනේ පුතේ..ඔය මනස්ගාත මගේ ඉස්සරහ කිව්වට කමක් නෑ..තාත්තා ඉස්සරහ කියන්න එපා..ඒ මනුස්සයත් දැන් ඉන්නේ හරි හිතේ අමාරුවෙන්..ඕවා ඇහුවම තවත් ප්‍රශ්න..”

අම්මලා ඉන්න තත්වේ හිතා ගන්න බැරිකමක් මට නැහැ..ඒත් අහස්ව අමතක කරනව කියන තැනත් මං නැහැ..දැන් අක්කා වුණත් ගෙදර එනවා අඩුයි..අඩුයි කියන්නේ එන්නෙම නැති තරම්..හසිත් අයියා මුල් කාලේ හොදින් හිටියට පස්සේ අක්කා අපේ ගෙදර එනවට එයාගේ වැඩි කැමැත්තක් නැහැ..අම්මලා වුණත් මුකුත් නොකියා ඉන්නේ මොනවා වුණත් අක්කා දැන් හොදින් ඉන්න නිසා..

“පොඩි දූ..මොනවද අර අම්මා එක්ක කියෙව්වේ..ආහ්හ්..මං හැමදේම අහන් හිටියේ..”

තාත්තා ටිකක් සද්දෙට එහෙම ඇහුවේ මාව බය කරන්නත් හිතන් වෙන්න ඇති..ඒත් හැමදාම සද්ද නැතුව ඉන්න ගියොත් වෙන්නේ මට කැමති කිසිම දෙයක් ලබා ගන්න බැරි වෙන එක විතරයි..

“කියන්න ඕනේ දේ කිව්වේ තාත්තේ..කොහොමත් ඔයාලා අහස්ට කැමති නැත්තම් මං හොරෙන් හරි යනවා..එච්චරයි..”

හිතට ආපු හැමදේම කියාගෙන කියාගෙන ගියේ ඕනේ දෙයක් වෙද්දෙන් කියලා…ගෙදර අයගේ කැමැත්ත කොහොම හරි ගන්න ඕනේමයි කියලයි මගේ හිත කිව්වේ..හොරෙන් අහස් එක්ක යන්න අදහසක් නොතිබ්බත් එහෙම කිව්වේ තාත්තගේ හිත වෙනස් කරන්න හිතාගෙන..

“ඔය කොල්ලට ඔච්චරම උඹව ඕනේ නං ඇවිල්ලා මාව හම්බෙන්න කියපන්..උඹල ඔක්කොම කරන්නේ අපේ සැනසීම නැති කරන එක විතරයි..”

හිතින් දහස් වාරයක් තාත්තගෙන් සමාව ඉල්ලුවේ මේ දේ මං කරන්නම ඕනේ නිසා..ලැබුනු අවසරයෙන් අහස්ට කෝල් කලේ හෙටම ඇවිල්ලා තාත්තව හම්බෙන්න කියලා..

———————————————————————————-

“මැණික…මං ඇවිල්ලා පාර ලග ඉන්නේ..”

“ඔතනට වෙලා ඉන්නේ එන්න ගෙදරට..”

අහස් එනකම්ම එලියට වෙලා බලන් හිටියේ අම්මා ගෙට වෙලා ඉන්න කියලා කෑ ගහද්දිමයි..
බයික් එක ගේ ලග නතර කරලා අහස් ආවේ ටිකක් විතර බයෙන් කියලා එයාගේ මූණෙන්ම පෙණුනා..

“ආහ්හ්..මේ ලමයා ඇවිල්ලා තියෙන්නේ..වාඩි වුණා නං මට ටිකක් කතා කරන්න ඕනේ ඒකයි එන්න කිව්වේ..”

“තෑන්ක්ස් අංකල්..”

“පොඩි දූ තේ එකක් හදන් එන්න ගිහින්..”

“හ්ම්ම්ම්..”

“මේ කෙල්ලගේ හිතුවක්කාරකම නැත්තං මං මේ කටයුත්තට කොහොමත් කැමති වෙන්නේ නෑ..හැබැයි මගේ කොන්දේසී තියෙනවා..”

“ඒ මොනවද අංකල්..”

“කසාද බැන්දා කියලා මගේ කෙල්ලව මෙහෙන් අරන් යන්න බෑ..දෙන්නා එක්කම මෙහේ නතර වෙන්න ඕනේ..ඔය පවුලේ අය ඉන්න පැත්තකටවත් මගේ දරුවා අරන් යන්න දෙන්න බෑ..”

“ඒත්..අංකල්..”

“ඒත්..මේත්..කතා වැඩක් නෑ මට..ඒකට එකග නම් මේක වෙයි..නැත්තං ඔය ලමයා වෙන අතක් බලා ගන්න එක තමයි හොද..”

තාත්තා ඉස්සරහ අහස් හැමදේටම කැමති වුණේ වෙන කරන්න කිසිම දෙයක් නැති නිසා..

“ඒත් සුදු නෝනා මං කොහොමද එහෙම මෙහේ නතර වෙන්නේ..”

“තාත්තාව කැමති කර ගත්තෙත් බොහොම අමාරුවෙන් අයියේ…එයාට බය ඇති මාව එහේ යවන්න..”

“දැන් ඔයාටත් එහෙම බයක් තියනවද අපේ ගෙදර යන්න..දෙයියනේ…මං ඉන්නවනේ..”

“මං බය නෑ අයියා..ඒත් ටිකක් තේරුම් ගන්න..පස්සේ තාත්තලා තේරුම් ගනී..එතකම් ඉමු අපි..”

හිතෙන් ලොකූ ප්ලෑන් එකක් ක්‍රියාත්මක කර කර හිටපු මට තාත්තා මේකට කැමති වුණ එකම ලොකු ජයග්‍රහණයක් වගේ දැණුනා..අහස්ටත් එයාලගේ ගෙදර අයව කැමති කරව ගන්න ලොකු වෙහෙසක් දරන්න වුණත් කොහොම හරි අන්තිමට ගෙවල් දෙකේම ආශිර්වාදය අපිට ලැබුණා..

———————————————————————————

තාමත් අවුරුදු විස්සක් වෙච්ච මං අද මගේ පළවෙනි ආදරේම විවාහ කර ගන්න ලෑස්ති වෙන්නේ සියුම් දුකක්ද හිත පුරා ඇවිලෙද්දී..මගේම සහෝදරියෝ දෙන්නම අද මේ විශේෂ මොහොතේ මං ළග නැහැ..ඒ අඩුව හිතේ කොනක හංගගෙන අහස්ගේ පතිනිය වුණේ හැමෝගෙම ආශිර්වාදය මැද්දේ..

අහස්ගේ කැමැත්තට සතියක් විතර අහස්ගේ ගෙදර ඉන්න ඕනේ වුණත් අම්මලව කැමති කර ගන්න එක නං ලේසී වුණේ නැහැ..

“මට බයයි දරුවෝ..ඔය ගෙදරට ගිහින් ආයේ අපිට මොනව හරි වුණොත්..”

“බය වෙන්න එපා අම්මා..අහස් ඉන්නවනේ..අනික අපි දැන් මැරි කරලා ඉන්නේ..”

“අනේ පුතේ…හිතේ ගින්දරින් මායි තාත්තයි ඉන්නේ..ඔයා හිතුවක්කර තීරණයක් ගනී කියලයි අපි මේ කසාදෙට වුණත් කැමති වුණේ..”

“අහස්ගේ කැමැත්තනේ අම්මා..සතියයිනේ..ඕක ඉක්මනට ගෙවිල යයි..”

“අනේ මන්දා දරුවෝ..”

අම්මා එහෙම කියලා ගියේ තව කොච්චර කිව්වත් වැඩක් නෑ කියලා තේරුන නිසා වෙන්න ඇති..මටත් අහස්ගේ ගෙදර යන්නම ඕනේ කියල හිත බල කලා..ඒ නිසාමයි අහස්ගේ තීරණේට මං කැමති වුණේ..