නංගි ගෙදර එනවා කිව්ව නිසා උදෙන්ම නැගිටලා ගේ අස් කරලා කෙල්ලට රසට කන්න කෑමත් හැදුවා..ඉක්මනින් වැඩ කරලා ඉවර වුණ නිසාද කොහෙද නංගි පරක්කුයි වගේ දැණුනේ..දවල් එක විතර වෙද්දී කෙල්ල ගෙදර ආවා..

“මහන්සි පොඩී..බස් වල එන්න එපා වෙනව..”

“මං බීම හැදුවා..ඉන්නකෝ අරන් එන්නං..”

නංගි වෙනුවෙන්ම හදපු බීම එක අරන් ඇවිල්ලා එයාට දීලා බලන් හිටියේ පොඩි එකෙක් වගේ රස කර කර බොන හැටි..

“ඇග සෝද ගන්නකෝ චූටි..මං කෑම ලෑස්ති කරන්නම්..”

මං දිහා ටිකක් වෙලා බලන් හිටිය නංගි ලගට ඇවිල්ලා මගේ අත් දෙකෙන් අල්ල ගත්තා..

“ඔයා අද සතුටින් ලොකූ..”

“එහෙම දෙයක් නෑ චූටියෝ..ඔයා ආවනේ..මට පාලු නෑනේ..”

“ඒක බොරුවක්..ඇත්ත කියන්න..අහස් අයියව හම්බුනා නේද..”

තවත් නංගිට බොරු කියලා තේරුමක් නෑ වගේ හිතුන නිසා ඊයේ සිද්ද වුණ හැමදේම මුල ඉදන් අග වෙනකම්ම කිව්වා..හිතටත් නිදහස් වගේ..හොර වැඩක් කලත් මං ඒක කාට හරි කිව්වනේ..

“අහන්න පොඩී..ගෙදරින් කවදාවත් ඔය සම්බන්දෙට කැමැත්ත ලැබෙන්නේ නෑ..ඒ නිසා ඔයා හොදයි කියල හිතෙන තීරණයක් ගන්න..”

“මං ඒක දන්නව චූටි..බලමුකෝ..කවදම හරි කැමති වෙයිනේ..”

“ඒව නං හීන තමයි..ඔයා දුක් විදින්න එපා පොඩී..මට බලන් ඉන්න බෑ..අනික ඔයාට ලොකු දුකක් දරා ගන්නත් බෑ..ඒ නිසා ඔයාගේ සතුට තියන තැන ඔයා නතර වෙන්න..”

“මට ඕක කියන්නද මෙච්චර දුර ආවේ..ආහ්හ්..”

“විහිලු නෙවෙයි…මටත් කවද වෙනකං උදව් කරන්න පුලුවන් වෙයිද දන්නේ නෑනේ..”

එහෙම කියල නංගි කාමරේට ගියා..අම්මලත් නංගි ආව නිසා ගෙදර එනවා කිව්වා..ආයේ ඉතින් අහස්ට කෝල් එකක්වත් අරන් ඉවරයි..මං හිතුවේ එහෙමයි..

————————————————————————–

“හරි මහන්සි දරුවෝ..දවස් ගානක් ලෙඩෙක් ලග සාත්තුවට ඉන්නව කියන එකත් ලේසි නෑ..”

“අම්ම එහෙනං ටිකක් නිදා ගන්න..මං කොහොමත් දවල් රෑටත් එක්කම ඉව්වා..”

“ඒක හොදයි..ඇගපත හෝදන් නිදා ගන්න ඕනේ ටිකක්..තාත්තත් එනව කිව්වනේ..ආවම මට කතා කරන්න පුතේ..”

කොච්චර අපි නරක වැඩ කලත් අම්මට ඒව මතක ටික දවසයි…ඒ අපේ අම්මගේ හැටි..අපිට පොඩි තුවාලයක් වුණත් අපිට කලින් අම්ම අඩනව..වෙලාවකට මං නිසා අම්මා දුකින් ඉන්නවදෝ කියලත් හිතෙනවා..

තාත්තත් ගෙදර ආවේ රෑ වෙලා..හැමෝම කාලා බීලා නිදා ගත්තේ දහයට විතර..උදේ පාන්දරම නැගිටින එක මගේ පුරුද්දක්..මං එහෙම නැගිට්ටත් නංගි නං ටිකක් කම්මැලි..එයාට දවල් වෙනකං නිදා ගන්න ඕනේ..

හදිස්සියේ ගෙදර ආවේ ඇයි කියලා ඇහුවත් නංගි කිව්වේ අම්මලා ගෙදර නැති නිසා මගේ තනියට ආවා කියලා..තාත්තා නං ඉස්කෝලේ වැඩ පාඩු වෙනව කියල බැන්න එක විතරයි කලේ..

වෙනදා වගේම උදෙන්ම නැගිට්ටේ අම්මත් උදේන්ම වැඩ පටන් ගන්නව කියල දන්න නිසා..පොඩි උදව්වක්වත් දෙන්න පුලුවන් වුණා නම් අම්මට තව මහන්සි වෙන්න ඕනේ නෑනේ..

ඒත් මං නැගිටිනකොට නංගි ඇදේ නෑ..අද ඉර අනිත් පැත්තෙන් පායලද මන්දා..කොට්ටේ අස්සේ හංගගෙන හිටිය ෆෝන් එක අරන් අහස්ටත් ගුඩ් මෝනින් කියල මැසේජ් එකක් දාලා මාත් කුස්සියට ආවා..

“නැගිට්ටද පොඩී දූ..ඉන්න මං තේ හදන්නම්..”

“නංගී මොකද අම්මා අද උදෙන්ම නැගිටලා..”

“කෝ නැගිටලද..මං දැක්කෙත් නෑනේ..සාලේට වෙලා ටීවී බලනවද දන්නේ නෑ..”

“පිස්සුද අම්මා..මේ වෙලාවට මොනව බලන්නද..”

“අනේ මන්දා දරුවො..එයාට වෙලාවක් කලාවක් තියනවද ඕක බලන්න..මෙන්න දෙන්නටම තේ හැදුවා..නංගිටත් ගිහින් දෙන්න.”

“චූටී..එන්න තේ බොන්න..”

නංගිට කතා කරගෙනම සාලෙට ගියත් එයා සාලෙත් නෑ..ඉස්සරහ දොරත් වහලා..වොශ් රූම් එකේ වෙන්න ඇති කියල හිතලා මං ඒ පැත්තට ගියේ තේ හැදුවා කියන්න..ඒත් එතනත් නෑ..ආයෙත් කාමරේට ආවත් කාමරෙත් නෑ..ගේ වටේම ඇවිද්දත් නංගිව හොයා ගන්න මට බැරි වුණා..

“අනේ…අම්මා..නංගි නෑනේ කොහෙවත්..”

“ඔය කොහෙට හරි වෙලා ඇති දරුවෝ..සීයා ෆෝන් එකක් අරන් දීලනේ ඕක ඔබ ඔබ ඇති..”

ආයෙත් ටිකක් හොයල බලන්න ඕනේ නිසා සාලෙන් එලියට යන්න ගිහිල්ලත් මං ආයේ කාමරේට ගියා..නංගිගේ ෆෝන් එක මගේ පොත් මේසේ උඩ තියනව..හිතට පොඩි තිගැස්මක් ආවත් ගෙදර අවටම නංගි ඇති කියල හිතලා ආයෙත් හොයන්න ගත්තා..කොහෙන්වත් නංගිව හොයා ගන්න බැරි වෙනකොට මගේ ඇස් වල කදුලුත් පිරිලා..

“අම්මේ..නංගි කොහෙවත් නෑ අම්මේ..ෆෝන් එක කාමරේ තියෙනව..”

“චූටි කොහේ කියල යන්නද දරුවෝ මේ උදේ පාන්දර..”

“මොකද පොඩි දූ කෑගහන්නේ..දැන් කොච්චර වෙලා ඉදන්ද මං අහන් ඉන්නේ..”

“අනේ තාත්තේ නංගි නෑනේ..අපි ටිකක් හොයමු..මං හැමතැනම බැලුවා..”

“පොඩි දු..මාත් එක්ක විහිලු කලාට කමක් නෑ..දන්නවනේ තාත්තට තරහ යනවා..”

“දෙයියනේ…මං විහිලුවක් නෙවෙයි කරන්නේ..ඇත්තමයි අම්මේ..චූටි නෑ..”

එතකොට නං අම්මයි තාත්තයි දෙන්නත් බය වුණා..අපි තුන් දෙනාම හැමතැනකම නංගිව හෙව්වත් හොයා ගන්න බැරි වුණා..තාත්තා කෝල් කල නිසාම රශාන් අයියා කවිදු අයියා වගේම අපේ ගොඩක් නෑදෑයෝ ගෙදරට ආවා..ගමේ හැම අස්සක් මුල්ලක් නෑරම නංගිව කොච්චර හෙව්වත් අපිට එක හෝඩුවාවක්වත් ලැබුනේ නෑ..ඒ නිසාමයි තාත්තා පොලිසියට ගියේ..

පොලිසියෙන් අපේ ගෙදරට එන්න නං ලොකු වෙලාවක් ගියේ නැහැ..අපි හැමෝගෙන්ම කට උත්තර ගත්තට පස්සේ නංගිගේ ෆෝන් එකත් එයාලා ඉල්ල ගත්තේ මොනවම හරි දෙයක් ඒකෙන් හොයා ගන්න පුලුවන් වෙයි කියල හිතලා..