10 කොටස

” වීරෙ අංකල් ඔයා…”

අපේ තාත්තව අමතපු ඇය තාත්තගේ මූණ අත් දෙකෙන්ම අත ගගා අඬන්න ගත්තේ පොඩි එකෙක් වගේ.

” චූටි දූ…මගේ කෙල්ල …”

තාත්තා ඇයව පපුවට තුරුල් කර ගත්තේ ඇස් වල කඳුළු පුරවගෙනම.අපේ තාත්තව තුරුල් කරන් අඬන මේ කෙල්ලව මට තේරුම් ගන්න බැරි වුණා .

අපි රනුදි ව අඳුනන්නෙ නැති වුණත් රනුදියි අපෙ තාත්තයි හොඳටම දන්න කියන දෙන්නෙක් කියලයි මට තේරුණේ .

” තරුවෝ….මේ මොකක්ද බං වෙන්නේ ….

උඹලගෙ තාත්තයි රනු නංගියි අපිට සර්ප්‍රයිස් දෙනවනේ බං….”

” ඒකම තමයි කලුවෝ මාත් බැලුවේ …මේ දෙන්නා බර කාලෙක ඉඳන් අඳුරන දෙන්නෙක් වගේනේ…”

” චූටි දූ…ඇයි මැණික මේ අංකල්ට නොකියම ගමෙන් ගියේ….

දන්නවද අංකල් කොයි තරම් ඔයාව හෙව්වද කියලා ….ඒත් කිසිම විස්තරයක් දැන ගන්න ලැබුණේ නෑ මට….”

” තාත්තිගෙ ෆියුනරල් එකෙන් පස්සේ අම්මට ගමෙන් යන්න ඕන උනා අංකල් …

එයා කැමති වුණේ නෑ අපි කොහේ යනවද කියලා කවුරුත් දැන ගන්නවට….ඔයා දන්නවනේ ඇයි කියලා ….”

” මං ඔයාව ගොඩක් කල් හෙව්වා චූටි දූ…

යාළුවෝ කවුරුත් දැනගෙන හිටියේ නෑ අම්මා ඔයාව කොහේ අරන් ගියාද කියලා ….”

” අම්මි දැනගෙන හිටියා අංකල් ඔයා මාව අරන් යයි කියලා …ඒකයි එයා එහෙම කරේ…”

” කමක් නෑ මැණික ….කොහොම හරි අන්තිමට ඔයා මං ළඟටම ආවනේ….

තාත්තගේ ඉල්ලීම කොහොම හරි ඉෂ්ඨ වුණා එහෙනම් ….යමු ගේ ඇතුලට …

මෙහෙම හිටගෙන ඉන්න හොඳ නෑ ඔයාට….”

” අංකල් මොකක්ද මේ අපි නොදන්න ගනුදෙනුව ඔයාලා දෙන්නටම තියෙන ….

බලපන්කෝ තරුවො අපියි දැන් මේ කෙල්ලව එක්කන් ආවේ ….

දැන් නිකන් අපිව අඳුරන්නේ නැති ගානටනේ මෙයා ඉන්නේ …”

” අනේ නෑ …නෑ ..මනි අයියේ ….මේ තමයි මගෙ දෙවෙනි තාත්තා ….

ඔයාලා දන්නේ නැති වුණාට චූටි කාලෙ ඉඳන්ම මම අංකල් ව දන්නේ ….”

” ආ…නංගි මොකක්ද ඒ කතාවේ තේරුම…”

” මේ මගේ හොඳම යාළුවා මාරගොඩගේ දුව මනීෂ පුතා…

මාරෙගෙ අන්තිම කැමැත්ත වුණේ චූටි දුව මගේ ළඟට එන එක…”

” ඒ කියන්නේ අංකල් …මට තේරුණේ නෑ ….”

” අපේ චූටි පුතයි,චූටු දූයි එක වයසේ පුතා…. ඉපදුනෙත් එකම දවසේ…

මේ දෙන්නගේ අම්මලා ඉස්සර ක්ලිනික් ගියේ එකට…මාරෙට ඕන උනේ කොල්ලෙක් …

එතකොට අපිට ඕන උනේ කෙල්ලෙක් ….මොකද එතකොට අපිට ලොකු පුතා හිටියනේ..”

” රනූ නංගි… කතා කර කරම අපි යමු ඇතුලට ….. ඔයාට හිටගෙන ඉන්න හොඳ නෑනේ ඔහොම ….”

තාත්තා ඉද්දිම මම ඇගේ අතකින් අල්ලගෙන ගේ ඇතුලට එක්කන් ඇවිත් සෝෆා එකෙන් වාඩි කෙරෙව්වා .

මනියි කලුයි තාත්තයි තුන් දෙනත් වාඩි වුණේ කතාව සම්පූර්ණ කරන්න ඕන නිසා .මාත් ගිහින් රනූට පොඩ්ඩක් එහායින්ම වාඩි වුණා .

ඒත් මගේ රෝස මල බලන්නේ නැතුව හිතට හරි නෑ වගේ මට.ඒ නිසාම තාත්තගෙන් ඇහුවේ මගේ රෝස මල ගැන.

” තාත්තෙ කෝ මගෙ කෙල්ල ….”

” උදේ නැගිටලා මල්ලිත් එක්ක කෝලම් කර කර ඉඳලා අන්න මල්ලිට තුරුල් වෙලා නිදි….”

” අනේ ඉන්න තාත්තෙ….මං ටිකක් කෙල්ලව බලල එන්නම් ….

ඊට පස්සේ කතාවෙ ඉතිරි ටික කියන්න ….”

මම එහෙම කියලා ගියේ මල්ලිගෙ කාමරේට . ඇඟිල්ලකුත් උරන ගමන් මගෙ මැණික මල්ලිට තුරුල් වෙලා සනීපෙට නිදි.

තාත්තා බයේ වෙන්න ඇති අනිත් පැත්තෙන් කොට්ට පේළියක්ම තියලා.

ඇත්තටම දැන් චූටි දෝණි ටිකක් දඟයි.පෙරලෙනවා එහාට මෙහාට .යන්තමට වාඩි වෙන්නත් හදනවා.

ඒ නිසා ගොඩක් පරිස්සම් කරන්න ඕන එයාව.අතට ගත්තේ නෑ මං මගෙ රෝස මලව.

තාම මං ඉන්නේ හොස්පිට්ල් ගිහින් ආපු ඇඳුම පිටින්නේ.නාගෙනම තමයි එයාව අතට ගන්නේ .ඒ තරමටම මගෙ කෙල්ලව මම පරිස්සම් කරනවා.

මම ඇගේ කොපුලකුත් ලාවට සිපගෙන එළියට ආවෙ තාත්තලා මං එනකම් බලාගෙන ඉන්න නිසා.