සූරියකන්දේ අභිරහස ?️
(05. කොටස)

දෙවන අභිරහස් ඝාතනයත් සිදු වී දෙදිනක් ගත විය. එදින උදෑසන වෙනදා නොමැති පිරිසක් කඩය අසල නොවීය . වරින්වර කිහිප දෙනෙකු පැමිණියේය. එනිසාම සාන්ත මුදලාලිගේ බිරිඳ මඟ බලා සිටියේ තවකෙකුගේ පැමිණීමේ අපේක්ෂාවයි. නමුත් එම අවස්ථාවේ කඩයට පැමිණියේ මින් පෙර නොදුටු රුවකි. ඔහු පැමිණ තමා රැගෙන ආ ගමන් මල්ල බිමින් තබා කඩය අසල වූ බංකුවෙන් වාඩි විය.

” නෝනා කන්න මොනවද තියෙන්නෙ ? ”
” කොළ වණ්ඩු තියෙනවා , ලැවරියා තියෙනවා”
“මට කොළ වණ්ඩු දෙකයි තේ එකයි දෙන්න”
මුදලාලි නෝනා ඔහු දෙස ⁣දෙතුන් වතාවක් බලමින් ඔහු ඇණවුම් කල දේ ලබා දුන්නේය.
” මේ ළමයව මම මීට කලින් දැකලා නෑ”
ඔහුගේ පෙනුමෙන් එතරම් වයසක් නොපෙන්වුනු අතර එය අවුරුදු විසි පහක පමණ තරුණ පෙනුමකට සමාන විය.
” බංගලාවේ මුර කරන්න කෙනෙක් හොයනවා කියලා පත්තරේ දාලා තිබුනා . මම මේ ඒක බලන්න ආවේ”
” හැබෑටම රත්නෙ මැරුණට පස්සෙ දැන් බංගලාවේ මුරට කවුරුත් නෑ නොවෑ. ඒක නෙවෙයි මේ ළමයගෙ ගම් පළාත එහෙම?”
” නෝනා මම කුරුණෑගල , ඉස්කොලේ ගියේ දහය වසරට වෙනකන් විතරයි. ගෙදර ප්‍රශ්න නිසාම ඉස්කෝලෙ ගමන නතර කරලා කුලී වැඩ කරා”
තරුණයාගේ කතාවට මුදලාලි නෝනා තරමක අනුකම්පාවෙන් ඔහු දෙස බැලුවේය.
” ඒක නෙවෙයි නෝනා කලින් බංගලාව මුර කරපු මනුස්සයට ලෙඩක් හැදිලද මැරුනේ?”
තරුණයා කොළ වණ්ඩුවක් අතට ගනිමින් ඇසුවේය.
” මොන පිස්සුද ළමයෝ මේ හොඳට හිටිය මිනිහා. දැන් දවස් හතරකට කලින් කිසිම හේතුවක් නැතුව මිනිහව මරලා දාලා තිබුනා. තාම හෝඩුවාවක් නෑ කවුද කරේ කියලා”
” මිනිහට තරහකාරයෝ එහෙම ඉන්නැති එහෙනම්”
” පිස්සුද ළමයෝ, මේ වත්තෙ හැම එකාත් එක්කම ඌ හොඳට හිටියා.මට ගලේ කෙටුවා වගේ කියන්න පුළුවන් වත්ත ඇතුලේ කිසිම එකෙක් මේ අපරාදේ ක⁣රේ නෑ කියලා”
සුළු වේලාවක් තුල තරුණයාට වැටහී ගියේ මුදලාලි නෝනා කයිවාරු ගැසීමට උපන් හපන් අයෙකු බවයි.
” මිනිහා මේ වත්තෙම කෙනෙක්ද නෝනා ?”
” මිනිහා දරු පවුල් කාරයා. ගෙවල් නුවර. හැබැයි ළමයෝ කාලෙක ඉඳන් මට පොඩි සැකයක් තිබුනා මිනිහා ගැන . ඒක සැකයක් නෙවෙයි කියලා ඔප්පු වෙන්න මහ කාලයක් ගියේ නෑ”
මුදලාලි නෝනා වටපිට බලමින් ඔහුට යාබදව තිබූ බංකුවෙන් හිඳ ගත්තේය. තරුණයාද ඇයගේ කතාව මහත් වුවමනාවෙන් ඇසීය.
” මිනිහා නුවර වුනාට මාසෙට දවස් තුනයි ගෙදර ගිහින් ඉන්නෙ. වැඩි දවසක්ම වත්තෙ තමයි. මේ වත්තෙ ඉන්නවා……………………
……….”
මුදලාලි නෝනාගේ දීර්ඝ කතාවෙන් පසු තරුණයා ඇයට තමා මිලදී ගත් ආහාර වල මුදල් ගෙවා ඉතිරියද තියාගන්නා ලෙස පවසා යාමට පිටත් වුනි.
” මම යනවා නෝනා එහෙනම් ”
” මට නෝනා කියන්න ඕන නෑ .. අපේ කෙල්ලත් ඔය වයසෙම වගේ වෙන්නැති. අනිත් කාරනේ මම මේ දේවල් කිව්වා කියලා මේ ළමයා කාටවත් කියන්නෙ එපා. මම හැමදේම කිව්වෙ මේ ළමයගෙ හොඳට . මොකද මේ වත්තෙ සමහර ගෑනු ඉන්නවා ඇහැට කනට පේන පිරිමියෙක් දැක්කම ඇගේ එල්ලෙන්න හදන”
” හරි ඇන්ටි, ඒ ගැන කිසිම සැකයක් හිතන්න එපා. එහෙනම් මම ගිහින් එන්නම් ”
” හොඳමයි ළමයො”
තරුණයා සුහදශීලිව ඇයට සමුදී බංගලාවට පිටත් විය
????????????????????????

සිතුවාට වඩා දුරක් බංගලාවට තිබුනු අතර අඩ හෝරාවක පමණ කාලයකින් පසු තරුණයා බංගලාවට පැමිණියේ අතරමඟදී හමු වූ පුද්ගලයන්ගේද උපකාරය ඇතිවයි. බංගලාවට පැමිණි තරුණයා දුටුවේ මිදුලට වී සුරතල් බල්ලෙකු සමඟ සිටින තරුණ යුවතියකි. ඒ විලී මහතාගේ දියණිය චාපාය. ඕස්ට්‍රේලියාවේ සිටි කාලය තුල වෛද්‍ය විද්‍යාව පිළිබඳව බොහෝ දේ ඇය හදාරමින් සිටියද ලංකාවට පැමිණීමත් සමඟ එය අතපසු විය. සුරතලාව අතට ගෙන නිවස තුලට යාමට සැරසුනු ඇය දුටුවේ තමාට මදක් දුරින් සිටි තරුණයාවයි. ඇය ඔහු අසලට ගොස් සුහදශීලී සිනහවකින් ඔහු ඇමතුවේය.
” නෝනා විලී මහත්තයා ඉන්නවද?”
” අප්පච්චි ඉන්නවා . ඔයා කවුද ?”
ඇය තරුණයාගේ හිසේ සිට දෙපතුල දක්වා නිරීක්ෂණය කලේය.
” නෝනා බංගලාවකට මුරකාරයෙක් හොයනවා කියලා පත්තරේ දාලා තිබුනා .”
” ආ පොඩ්ඩක් ඉන්න මම අප්පච්චිට එන්න කියන්නම් ”
ඇය නිවස තුලට ගොස් විනාඩි කිහිපයකට පසු විලී මහතා පැමිණියේය.
” ඔයා පත්තරේ නිව්ස් එක දැකලද ආවේ?”
විලී මහතා දුර සිටම තරුණයා වෙත සිනහවක් පාමින් ඇසුවේය.
” ඔව් මහත්තයා ”
” ඔයාගේ නම , ගම එහෙම ?”
” නාලක , මම කුරුණෑගල , මෙන්න මහත්තයා ”
තරුණයා තම ජාතික හැදුනුම්පත විලී මහතා ⁣වෙත ඉදිරිපත් කලේය.
” හොඳයි නාලකට පුළුවන් අද ඉදලා වැඩ කරන්න. කලින් කෙනාට මම හතලිස් දාහක් පඩිය දුන්නා. මම ඔයාට තව පන්දාහක් වැඩිපුර දෙනවා. දවල් දවසට නම් ලොකු දෙයක් නෑ . රෑට පොඩ්ඩක් සෙවිල්ලෙන් ඉන්න ඕන. මොකද මේ දවස්වල වෙන දේවල් එක්ක අපි ගොඩක් බයෙන් ඉන්නෙ”
” හරි මහත්තයා ”

තරුණයා තම පියා සමඟ කතා කරන අයුරු චාපා ඒ අසල වූ ජනේලයෙන් බලා සිටි අතර තම මව පිටුපසින් පැමිණෙන තුරුම ඇයට නොදැනුනේය.
” කවුද දුව ඒ ⁣කොල්ලා”
” අපි දාපු නිව්ස් එක දැකලා බංගලාවේ වොච්මන් වැඩේට ආපු අලුත් කෙනා”
තම දියණිය පැවසූ දෙය එකවර පිළිගැනීමට අපහසු කරුණක් බව ඇයට වැටහුණි.
” පුදුමයි, ඒ කොල්ලගෙ පෙනුමෙන් මම හිතුවෙ අප්පච්චිගේ යාලුවෙක්ගෙ පුතෙක්ද කියලා”
” අම්මට කියන්න මම ඊයේ බලපු ටැමිල් මූවි එකේ මේන් ඇක්ටර් ඔය වගේම කොල්ලෙක්”
චාපා පැවසූ අයුරින්ම නාලක පෙනුමෙන් අංග සම්පූර්ණ විය. ඇය නාලකව දුටු මුල් වරම සිතුවේ ඔහු නළුවෙකු යැයි සිතාය.

නාලක බංගලාවේ සේවයට පැමිණ දෙදිනක් ගත විය ඔහු තම රාජකාරිය නිසි අයුරින් සිදු කරනු දුටු විලී මහතා ඔහුව තම බිරිඳ හා දියණිය ඉදිරියේ ප්‍රශංසාවට ලක් කලේය. තවද ඔහු නිහඬ චරිතයක් බැවින් කාගෙත් සිත් දිනා ගත්තේය.
දිනක් බංගලාවට පහළින් වූ රබර් යාය අසලින් ගමන් කරන නාලකගේ නෙත ගැටෙන්නෙ රබර් ගස් කිහිපයකට මුවාවී දුරකථන ඇමතුමක සිටින පුද්ගලයෙකි . නාලක කුඩා හෝ ශබ්දයක් පිටතට නොඇසෙන ලෙස ඔහුට මඳක් ඈතින් වූ කැළෑ රොඳ අසලට මුවාවී ඔහුගේ කතාබහට සවන් දෙන්නෙ මතු වූ සැකය නිසාය.

***********************……………………………………………..***************
?️ නිම්නාද ලියනගේ නිර්මාණ වෑයමක් ?️ ???????????????